老翁跌出窗懸空倒掛 街坊捉腳20分鐘救命

觀塘翠屏北邨昨午發生驚險墮樓事件，一名7旬老翁，在家中晾衫期間意外失足墮樓，跌在樓下一晾衫架倒豎蔥式「吊吊揈」，幸得見義勇為街坊破門入屋奮不顧身捉緊老翁一隻腳，經過二十分鐘後，終由消防「飛將軍」成功將老翁救回屋內，他清醒送院治理。
卡7樓晾衫架「吊吊揈」

現場為翠屏北邨翠柳樓7樓一單位，險死的77歲老翁姓馬，獨居8樓一單位，事發在昨午3時13分，穿白背心的馬翁在家中晾衫期間意外失足，整個人跌出窗外，其中一隻腳卡在7樓的晾衫架倒豎蔥式「吊吊揈」，住在5樓的陸先生（阿聰）成為今次的救伯英雄，阿聰指事發時在家中玩電話，突然聽到窗外傳來「哎呀仔，我好辛苦呀」，他初時未有特別注意，然而未幾，窗外聲音卻變為「救命呀！」阿聰向窗外張望，大叫「係咪嗌救命呀？咩事呀」，及後應對方要求報警，問清楚對方所在樓層是7樓後，便衝上樓協助救人。

阿聰抵達事發單位旁邊的露台探頭外望，「見伯伯晾住喺晾衫架上面。當時拍門又無人應，我就即刻破門入咗佢間屋」。進入事發單位後見到對方卡在晾衫架，「成件事係好驚險，只可以即刻捉住咗佢腳，固定咗佢，希望佢唔好再郁嚟郁去，同埋安慰佢，及後雖然有市民上樓，但由於窗台狹窄，故難有空間幫手。」

阿聰感歎「係我人生經歷最長嘅20分鐘，我真係無晒力」；又指自己當時用盡全身力氣保持平衡，避免伯伯跌落樓，事後回家沖涼時才發覺肚皮位置有瘀傷，而且手臂也軟弱無力。最後警員及消防「飛將軍」陸續到場，一同協助將伯伯救回安全位置送院治理，阿聰坦言「救人係每個香港市民都係要做嘅一件事」，希望伯伯可以早日康復，日後能與伯伯及救人警員，3人一同飲茶。