樂●活｜一張飛逛盡4個展覽

書展、動漫展過後，後日（11日）就到美食博覽，同場仲有家電．家品．博覽、美與健生活博覽及香港國際茶展，真係可以花足全日留喺會展，慢慢行、慢慢逛。

美食博覽「公眾館」、家電．家品．博覽及美與健生活博覽會喺8月11至15日（星期四至星期一） 舉行，而美食博覽「尊貴美食區」就會喺8月11至14日舉行，至於美食博覽「貿易區」及香港國際茶展就係8月11至13日，想參觀唔同展館就要好好規劃行程！

買飛嘅時候可以留意，美食博覽「公眾館」、美食博覽「貿易區」、家電．家品．博覽、美與健生活博覽門票及香港國際茶展門票為$25，而以上展覽連美食博覽「尊貴美食區」套票就係$40。

美食博覽分為公眾館、尊貴美食區及貿易區，當中尊貴美食區雲集90家展商，展示來自亞洲及歐美幾頂級佳餚，各式甜品、有機綠色食品及精品咖啡，今年新設「啤酒．暢飲」主題，帶來多間本地手工啤酒廠嘅精釀啤酒。 

 至於公眾館就匯聚430多家展商，館內嘅美食薈萃廊網羅20多個知名品牌，而港九罐頭洋酒伙食行商會x南北行公所、香港飲食聯盟、香港人撐香港品牌、香港韓人商工會、香港食品科技協會、香港酒業總商會以及香港酒類行業協會亦組織展團，直接向消費者推介正版正貨。場內亦有多個地區展團透過本地代表參展，包括中國內地嘅農業農村部農業貿易促進中心、廣西壯族自治區及重慶市、日本青森縣、日本貿易振興機構和印尼，帶來當地特色美食及飲食文化。 

 美食博覽特色美食餐飲包括選用埃塞俄比亞西達摩日曬單品咖啡豆嘅冷泡咖啡、無添加糖雪糕、來自馬來西亞LEAVES砂拉越三色奶茶等。場內亦有唔少適合素食者嘅可持續且健康嘅素食選擇，包括泰式青咖喱植物雞肉、植物肉黃金雞塊，以及純植物蟹餅。  

打算趁美食博覽入手月餅的話，一樣有選擇，奇華餅家就準備咗美食博覽限定嘅角落小夥伴音樂列車奶皇月餅福袋、角落小夥伴奶皇月餅福袋，兩款都係每日限量100套。 此外，更可以優惠價入手會場獨家嘅限定4個裝奶皇月餅、奇華餅食福袋等。

至於貿易區就有超過100家展商，並設多個地區展館，包括中國內地多個省份如浙江、湖北，以及透過網上參展的四川展館等，產品包括浙江嘅紹興花雕酒、湖北嘅野生茶油、四川的松露酒等。

同期舉行嘅家電．家品．博覽，就會展示各式智能家居、廚房電器、廚具、餐具、家具及家庭用品，當中品牌專區「家之選大道」將匯聚接近40家展商及多個時尚生活品牌，包括煤氣公司、德國孖人牌、樂信牌、雅芳婷、Tiger、德國寶及張小泉等。博覽將呈獻多款創新產品，包括迷你抹窗機械人(Wi-Fi版本)、八頭EMS溫熱電療儀、智能3D搖擺循環風扇、智能養生壺等。 

而美與健生活博覽就有一系列美妝及適健產品，除咗香港美容業總會、香港美髮美容業商會、國際美容健康總聯合會及香港化粧品同業協會四大展團外，更有新參展嘅中國香港健美健身總會以及國際美業評審總會展團，帶來多元化美健產品，符合追求健康生活的消費者所需，當中包括有機仙果淨能卸妝水、香薰泡泡浴球、全方位家居健身器等。

鍾意品茗的話，就唔可以錯過香港國際茶展，大家可搵到多款特色產品，例如雲南大益茶、港式奶茶家用沖茶套裝等。展覽亦設有湖北展館，帶來當地名茶。大會亦邀請金茶王分享泡製港式奶茶嘅寶貴知識。 

順帶一提，已經收到電子消費券的話，仲可以喺4個展覽使用，超過9成受訪展商表示會支援至少其中一項電子消費券支付方式大展會期間每日會舉行多買多賞幸運大抽獎。獎品包括家庭用品、護膚產品、各式美食、健康用品、健身課程等。只要憑單一收據消費滿$200即可參與抽獎一次，每張收據上限抽獎五次。

另外，大會已推出「8月食．住．買」網頁，大眾可以緊貼最新嘅購物消息及各種快閃優惠，包括$1雞煲、鮑魚麵禮盒、榴槤冰皮月餅等，大家可預先下載近200張電子優惠券，買得更抵更着數。 

作者：Laurie Wu（愛保健愛旅遊愛購物的熟女）
[email protected]