【私追風波】列4點禁粉絲與MIRROR互動　花姐撰千字文向梁祖堯道歉

MIRROR日前在梅窩拍攝新節目《調教你MIRROR》，未料卻有超過200名「鏡粉」（MIRROR粉絲稱號）聞風而至，希望「野生捕獲」偶像。無奈因嚴重阻礙外景拍攝，即使工作人員及12位成員先後勸喻離去仍不果，導致拍攝項目要取消。連日來不少粉絲批評經理人花姐（黃慧君）擺MIRROR上枱，更令姜濤慘變「磨心」，而傳教MIRROR勸走私追粉絲的梁祖堯也受牽連，被轟為節目效果拍攝粉絲被鬧過程。

繼日前姜濤在Telegram發長文向「姜糖」（姜濤粉絲稱號）道歉後，昨晚花姐也就事件在IG貼出千字文，解釋開拍該節目的初衷：「因為《全民造星III》，我認識左（咗）祖堯老師，佢除左（咗）教導參賽者表演嘅技巧，仲可以令佢地（哋）更了解自己，勇敢面對自己嘅問題而得以改善，而且佢真心愛佢身邊嘅人，所以我地（哋）都叫佢做媽媽。後來，公司準備為MIRROR開一個綜藝節目，我不（忽）發奇想，如果開一個調教MIRROR嘅節目應該會幾好睇，大家可以更了解MIRROR，而且可以pass一個『面對自己稜角』嘅Message俾（畀）觀眾，重點係MIRROR亦可以透過呢個節目變成更好嘅人、更好嘅表演者。祖堯老師聽到呢個idea一口答應，不過佢話如果節目要達到我嘅效果，MIRROR要放低平時嘅偶像包袱，唔可以有其他人騷擾，同埋我唔可以在場。於是製作組一直將拍攝地點保密，連我都唔知。」

花姐又向節目主持梁祖堯道歉，她續道：「不過香港唔係好大，係（喺）拍攝嘅第一日已經有fans知道地點，仲係同一個營地book左（咗）房。拍攝第二日，大約有60個fans貼身跟著（着）MIRROR，製作組勸喻fans離開，到傍晚MIRROR同祖堯去到一間酒吧，fans聚集在門外，因為太多人，於是旁邊嘅店舖顧客同行人投訴，製作組無奈要將兩個拍攝item cancel。MIRROR 12子於是提出親身勸喻fans離開，祖堯打電話問我，我當時認為fans應該會聽MIRROR說話，所以批准佢地（哋）咁樣做，製作組亦答應唔會將fans嘅樣剪出街，只係想影MIRROR點樣自己面對同解決問題。呢兩日我收到好多dm，亦見到大家嘅留言，於是我決定出呢個post，我明白大家好愛MIRROR，但同時唔希望有人唔了解事件而針對幫緊MIRROR嘅人，我希望係（喺）度同祖堯老師，製作團隊道歉。」

之後，花姐列出以下4大不適當情況下會阻止粉絲與MIRROR成員互動：
1. 如果MIRROR成員因停低影相而令環境混亂，阻塞通道導致其他人不便，或喺唔適合嘅地方例如馬路，我都唔希望MIRROR成員停低同fans互動
2. MIRROR成員工作時，如果fans會影響到，我都會勸喻離開或保持較遠距離
3. 如果當時MIRROR成員嘅狀態不適合影相，我都會代佢地拒絕影相
4. 當fans影響到MIRROR成員嘅私人時間或私隱，都會被拒絕

最後，花姐強調兩年來接觸的大部份「鏡粉」都好乖、好體諒，也多謝一直愛錫MIRROR的粉絲，希望他們可以繼續陪MIRROR成長，又寄語12位成員把握今次學習機會，不要浪費祖堯老師及製作團隊的心血。