【Juicy叮】呻外傭晚上8時自動「落班」 港媽：放工仲要凑細路好攰

有媽媽在網上討論區「親子王國」發文抱怨，指家中外傭每晚8時之後自動「落班」，令她放工回家也要照顧小朋友很勞累。

網民透露，她家聘請的30多歲外傭早上7時半起床，照顧一個5歲小朋友，中間3個休息時間，無需去街市買餸，晚上準時8點收工，入房玩電話。港媽抱怨，「我同佢講過好多次，晚上8點之後係stand by（待命）,不是完全收工，佢都無改善，我可以點？我放工返屋企仲要自己照顧小朋友到10點，好累。」

港媽說，「不過佢自己洗完碗8點已經入房搽cream,...我有畀嘢佢做，但佢次次都趕住收工咁，我都無癮，佢心已經收咗工了，趕入房玩電話，而家又難請工人，無奈。」

有網民也類似經歷，「我之前有個晚晚7點35分準時收工入房。吃完晚飯的碗碟放在餐桌第二朝才收。我三個月內炒了她」。有網民建議，「每日安排啲野俾佢8點做到10點，搵野俾佢洗，執，抹，湊女，到10點你地冇其他吩咐至准沖涼入房休息，不設入房stand by時間，建議趁早同佢講唔好再拖，佢當自己係老細咩？規矩應該由你定，唔係畀佢自己定」

不過有網民認為要溝通清楚，「佢有無正式同你講只做到8點？佢入左房唔代表佢收工，有咩直接叫佢出黎做，如果要佢幫手凑小朋友就直接叫佢處理，但父母陪伴小朋友呢樣無得代工喎! 但如若佢已經做哂其他家務又無其他吩咐佢入房standby 都好正常! 有咩叫佢出嚟」、「咁8點前做晒所有嘢未？煮好飯？洗晒碗？拖晒地？晾熨晒啲衫？抹晒廁所廚房未？如果樣樣做妥，唔通要佢棟係廳到？」

有網民勸告要改變心態，「佢晚上做完晒野先入房，你唔怪得佢。之後若有事要佢做，你就拍門叫佢出嚟，吩咐佢做，你唔洗理佢點做，佢做得快趕收工咁係無問題。你要改變自己心態，唔洗因為咁就無引而唔叫佢做，寧願自己做」

有網民懷疑刻意想被炒，「咁嘅工人堅係離奇，係咪又係最新搏炒招數？好難忍佢喎...我同事好慳，自己都少開冷氣，當然唔太想工人自己一個在家開，而家工人姐姐玩搏炒啦，我同事同我講佢好後悔，早知俾個工人開冷氣，而家問襯中介，都話要7千人工先有得傾」