【好聲好戲】整體超晒班 「上位小生」黃庭鋒被激讚表演近乎完美
2021-05-29 06:43 
TVB節目《好聲好戲》昨晚最後一集，終極三強馮盈盈、張振朗、陳自瑤爭奪好聲好戲傑出聲演總冠軍，最終由陳自瑤以超水準表現，大熱姿態勝出。
劉佩玥嗌到阿媽叫唔好咁嘈
當晚最後一組旁聽生黃庭鋒及劉佩玥(Moon)都成亮點，皆因兩人合作聲演懷舊劇《童心》的「蝦叔」和「波仔」（李泳豪飾）發揮到超級表現，被評判團一致拍掌叫好得到7盞綠燈，阿姐語帶堅定答：「我覺得好，庭鋒我聽到你扮老人家把聲唔錯喎！佩玥都好，好可愛。」創意官王祖藍激讚庭鋒表演接近完美。王祖藍好奇問：「你哋個人練咗幾耐？點去練？」劉佩玥說：「我嗌到連阿媽都叫我唔好嘈！問我仲乜要扮小朋友喺度嗌？」庭鋒話兩人各自練完又再約出嚟磨合吓，好讓攝啲對白位會攝得靚啲。王祖藍滿意地盛讚兩人：「呢啲叫咩，一日唔練自己知，兩日唔練老師知，三日唔練觀眾知，你哋咁樣練法經已聽得出近乎完美。」配音員陸惠玲稍嫌Moon有小小女仔聲；鄭麗麗話庭鋒壓到一把咁嘅聲都幾犀利；何璐怡也說：「我好意外，整體超晒班咁。」
未配過音戰戰兢兢接受挑戰
黃庭鋒開心到不得了，他接受本報訪問時表示好興奮，未試過收到咁多正面嘅評價，唔少朋友短訊問他點樣可以扮到「蝦叔」？其實最初收到通知時覺得係一件冇可能嘅事，唔知點去演繹呢位有咁多人認識，咁有認可性嘅前輩把聲？後來跟配音員翟耀輝學習技巧，最慘每次佢都話唔得，因為只係做到聲沙版黃庭鋒：「咁我都煩惱咗好耐，惟有喺屋企日練夜練，直至有次開車時突然掌握到一啲啲竅門，咁我入晒記憶不停重覆去做，雖然我未試過配音，加上配音好難，但只要落功夫投入去做，可以做得好好。」
跟劉佩玥網上發文互相打氣
庭鋒昨晚喺IG出post跟Moon互相打氣，他寫道：「絕對沒有不被重視的人或工作，只是你選擇看到與否。這次的表演真正體會到配音員的努力和工作的挑戰性，我很享受這次和 @arryuu 的演出，只要你投入去做一件事，總會有人欣賞。」而Moon也有發文多謝庭鋒：「多謝你，我嘅好兄弟好拍檔！由《救妻同學會》開始識你到今日，你都好正能量，好努力！今次嘅合作好難得，好難忘嘅經驗，多謝你！我知道我哋同一班同事朋友都好想盡力做好每一個take，壓力同熱誠係由心而發的，唔止因為可以學習同表演，而係想表現製作嘅誠意，希望大家都睇得開心，最重要係睇到配音員們的努力同專業！各位，GOOD SHOWp.s. 希望大家下次再見我同TF合作就係《超能使者》同《把關者們》啦！」
最新回應