首拍電視劇壓力大　王智騫同呂爵安研究操肌秘技

有「翻版柯震東」之稱的24歲小鮮肉王智騫（Martin），繼早前演出處男作《熱血合唱團》和《八個女人一台戲》後，近日再由大銀幕踩入電視圈，夥拍MIRROR成員呂爵安（Edan）、邱士縉（Stanley）及魏浚笙（Jeffrey）等，主演ViuTV新劇《i.Swim》。對於首度拍劇，Martin直言緊張兼有壓力：「劇中演運動健將，除咗要身形管理外，仲有大量游水戲份，不過現實中我係運動白癡，人哋半小時學識嘅嘢，我要兩至三個鐘先學識。」

自言練習游泳進度比同劇演員慢的Martin，又感激王智德（Alton）幫忙教他，才令他容易上手。談到首次跟Edan、Jeffrey、吳啟洋及歐鎮灝合作，Martin透露眾人於鏡頭後不時大談「男人經」，他說：「我哋話題都係圍繞點樣操肌肉，同埋食啲咩健康餐單會令身形好啲。」