【獨家】四代同堂好歡欣 喬寶寶榮升爺爺抱住孫仔喬孝順唔捨得放
2021-09-02 11:00 
3年前見證住大仔「印度豹」娶醫生老婆嘅喬寶寶講明恨抱孫，喺英國時間8月30日，喬寶寶個新抱終於順產誕下7磅重兒子喇！恭喜！恭喜！
首度榮升爺爺嘅喬寶寶抱住孫B開心狂笑，笑到見牙唔見眼，相中見，只有幾日人仔嘅喬寶寶孫仔，輪廓分明，眼仔長長，雙眼皮好深，係個靚B。
他搞笑地說：「大仔及新抱改咗BB名做Khalson，中文譯名係喬孝順或者喬加薪，用嚟配合返屋企人啲名，包括喬老母、喬老竇、喬寶寶、喬嫂嫂、喬本龍(大仔)、喬寶貝(細仔)，我屬意多數改做喬孝順，因為𠵱家啲後生仔唔太留意啲父母，呢個名提示佢要做個孝順仔呀！」
催促兒子三年抱兩追個女
孫仔今日啱啱先喺醫院返到屋企，喬寶寶和喬老母及喬本龍、喬寶貝跟Khalson影四代同堂全家福，喬老母更目不轉睛望住個乖孫：「家姐、妹妹都返晒嚟，屋企變得好熱鬧，我老婆、BB爸爸媽媽、我細仔等個個爭住要抱抱，惟有輪住湊，BB集萬千寵愛在一身，𠵱家我都唔捨得離開屋企太耐，加上來港要隔離21日，真係悶喺酒店會精神分裂，所以日後有電影先會返嚟拍。」
21號係BB爸爸生日，到時順道慶祝埋Khalson滿月。他表示，印度家庭有喜，會倒啲油喺大門口左右門角，同時捐助弱勢社群，分享福報。而喬寶寶送咗張BB牀仔畀乖孫，喻意可以重用：「我叫咗阿仔快啲追返個女，好似我同二姐咁，年紀只係相差十個半月，三年抱兩咪好囉！但阿仔話要畀老婆休息吓先喎！」
最新回應