【独家】四代同堂好欢欣 乔宝宝荣升爷爷抱住孙仔乔孝顺唔舍得放
2021-09-02 11:00 
3年前见证住大仔「印度豹」娶医生老婆嘅乔宝宝讲明恨抱孙，喺英国时间8月30日，乔宝宝个新抱终于顺产诞下7磅重儿子喇！恭喜！恭喜！
首度荣升爷爷嘅乔宝宝抱住孙B开心狂笑，笑到见牙唔见眼，相中见，只有几日人仔嘅乔宝宝孙仔，轮廓分明，眼仔长长，双眼皮好深，系个靓B。
他搞笑地说：「大仔及新抱改咗BB名做Khalson，中文译名系乔孝顺或者乔加薪，用嚟配合返屋企人啲名，包括乔老母、乔老窦、乔宝宝、乔嫂嫂、乔本龙(大仔)、乔宝贝(细仔)，我属意多数改做乔孝顺，因为𠵱家啲后生仔唔太留意啲父母，呢个名提示佢要做个孝顺仔呀！」
催促儿子三年抱两追个女
孙仔今日啱啱先喺医院返到屋企，乔宝宝和乔老母及乔本龙、乔宝贝跟Khalson影四代同堂全家福，乔老母更目不转睛望住个乖孙：「家姐、妹妹都返晒嚟，屋企变得好热闹，我老婆、BB爸爸妈妈、我细仔等个个争住要抱抱，惟有轮住凑，BB集万千宠爱在一身，𠵱家我都唔舍得离开屋企太耐，加上来港要隔离21日，真系闷喺酒店会精神分裂，所以日后有电影先会返嚟拍。」
21号系BB爸爸生日，到时顺道庆祝埋Khalson满月。他表示，印度家庭有喜，会倒啲油喺大门口左右门角，同时捐助弱势社群，分享福报。而乔宝宝送咗张BB牀仔畀乖孙，喻意可以重用：「我叫咗阿仔快啲追返个女，好似我同二姐咁，年纪只系相差十个半月，三年抱两咪好罗！但阿仔话要畀老婆休息吓先喎！」
最新回应