古天后日誌｜香港需盡快通關以維持競爭力

7月18日，大致天晴，天氣酷熱，但局部地區有驟雨。美股上周五強勢反彈，主要係靠零售數據表現唔錯，市場對經濟衰退憂慮有所緩和，道指升658點；標指跟納指則分別升72點及201點。嚟緊繼續有重磅股公布業績，今晚輪到高盛跟美銀，周三到Tesla，呢啲大型企業嘅業績，唔多唔少都會左右美股去向。而下周聯儲局議息，市場已完全接受今次加息0.75厘，問題係喺通脹高企下，加速步伐是否需要加快，今次及9月加息幅度增至1厘，將左右美股去向。

至於亞洲呢邊，隨住歐美貨幣政策收緊，美元走勢愈趨強勁下，亞洲貨幣已受不同程度打擊。而港元因美元強勢，頻見走資，金管局近日更密密出手「接貨」買入港元沽盤，反映港美息差拉闊下正刺激走資套息活動，走資提速下，本地銀行結餘2000億岌岌可危，遲早跌穿。 

而本港經濟上半年受到第五波疫情重擊，已陷入萎縮，踏入下半年，商界期望隨着社交距離措施進一步放寬，中港有望恢復正常通關，企業景氣度將明顯復甦，惟憂慮外圍環境轉弱、需求降溫之下，有專家料香港經濟前景難言樂觀。事實上，即使下半年本地零售表現雖將較上半年改善，惟環球加息及通脹令居民消費變得「手緊」，料本地消費反彈周期暫已見頂，預計今年零售業或實現零增長。

本港經濟遲遲未能復甦

另一方面，近年香港掀起移民潮，市場憂慮人才跟資金同時流走，削弱本港競爭力。亞洲唔少國家已重開邊境，如本港長期保持較嚴格出入境管制，若長期維持呢個差異，固定資本縮額持續下跌，反映本地企業及外企對疫下擴張在港業務態度相對保守。而美國息率持續上升，港元拆息難免要跟隨加息步伐而向上，本港中小企或難以承受較高融資成本。

而喺市場憂環球經濟前景轉差，香港貨物出口的增速將放緩下，本港5月出口數據再次轉跌，即使下半年數值回升，都係由通脹推升，並不代表需求反彈。目前香港需要盡快重新對外通關，但人流仍需要至少一年時間，方能恢復至疫情至水平。

除咗本港經濟遲遲未能復甦外，港股主要由內地企業所組成，近日內地斷供潮，不僅影響到本來已疲弱嘅內房及物管板塊，市場對斷供潮憂慮而延伸至內銀股。雖然中央高度重視相關問題，因為除咗影響到經濟之外，亦有機會影響到社會穩定，而穩定一向係中央至為重視，重中之重嘅問題，暫時要睇阿爺如何出手去收拾殘局。而個別具國企或央企背景嘅內房股，料可成為今次行業整改嘅贏家，而個別具實力嘅民企，亦可成為今次嘅生還者，碧桂園服務(06098)已出手回購，除咗反映公司睇好未來前景之外，同時亦反映現價低殘。其實碧桂園(02007)孖寶今次受拖累急跌，確係有啲過份，公司未有出現任何爛尾項目，公司亦未曾拖延償還任何債務，而未來兩年亦未有美債到期，只係其民企身份令市場對其欠缺信心，實際上碧桂園唔應該低殘成咁，目前估值可以話係蔗渣價錢，燒鵝脾質素。

古天后

(徐狄怡，證監會持牌人)