古天后日誌｜港股缺水難見突破走出困局

7月28日，天晴，天氣酷熱，高溫天氣持續，留意補充水份，避免中暑。隔晚美股大升，FOMC一如預期加息0.75厘，重點係鮑爺強調美國經濟未見陷入衰退，主要係就業市場仍然強勁。

鮑爺嘅講話，可以解讀為市場仍有條件加息，因為經濟未見衰退，喺通脹高企下，加息壓抑通脹係主要手段。不過市場更為關注美國經濟會否陷入衰退，通脹高企唔緊要，只要經濟表現仍然理想，呢個唔係問題。

市場樂觀情緒持續，就算Google跟微軟業績增長放緩，股價照升可也，而唔少大型企業已表示要省減開支，甚至裁員，市場一樣無視呢一類利淡消息。美股近日嘅升勢，可以話樂觀得過份，主要係之前市場過度悲觀，太多人做淡睇淡，結果大戶一個反手，大挾淡倉，情況跟6月港股挾升至22000水平相似，挾升根本唔需要理由，淡友冚倉帶動。問題係挾完呢輪淡倉後，再有冇資金入場，令美股可以更上一層樓，目前仍有待觀察。

繼續塘水滾塘魚困局

至於港股，喺6月放完一輪煙花，成個7月好明顯就再無資金支持向上，反而係反覆向下，個個都係趁大市回升當日，就減磅走人。就連北水炒作嘅股份亦相當短癮，今日買完，一兩日走人，甚至上晝買完，下晝已掉轉槍頭走人。呢啲短線炒作，令港股處於上上落落格局，但問題係港股一直升唔起，係一眾重磅股嘅大股東，都係趁高減持。

騰訊(00700)主要股東南非基金，已講到明手上嘅貨待價而沽，令騰訊近日股價表現死氣沉沉；比亞迪(01211)主要股東股神巴菲特，亦將手上股份轉倉到CCASS，即使暫時未見大手減持，亦難免惹起市場揣測。而阿里(09988)主要股東軟銀，就斷斷續續地搬貨去CCASS，沿路減持，而軟銀手上持有超遆兩成阿里股份，減持行動睇嚟有排搞。而剛剛美團(03690)嘅非執董沈南鵬，呢幾日又再喺市場減持，套現咗12億。

上述種種都係令到港股寸步難行嘅原因，再望一望港股7月份整體成交，縮水情況嚴重，唔少日子單日成交低過1000億元，即係呢邊面對重磅股被減持問題，一邊又要面對無資金流入問題。咁嘅情況之下，試問港股有何本事向上突破，目前只能區間移動，繼續塘水滾塘魚嘅困局。

 

(徐狄怡，證監會持牌人)