古天后日志｜港股缺水难见突破走出困局

7月28日，天晴，天气酷热，高温天气持续，留意补充水份，避免中暑。隔晚美股大升，FOMC一如预期加息0.75厘，重点系鲍爷强调美国经济未见陷入衰退，主要系就业市场仍然强劲。

鲍爷嘅讲话，可以解读为市场仍有条件加息，因为经济未见衰退，喺通胀高企下，加息压抑通胀系主要手段。不过市场更为关注美国经济会否陷入衰退，通胀高企唔紧要，只要经济表现仍然理想，呢个唔系问题。

市场乐观情绪持续，就算Google跟微软业绩增长放缓，股价照升可也，而唔少大型企业已表示要省减开支，甚至裁员，市场一样无视呢一类利淡消息。美股近日嘅升势，可以话乐观得过份，主要系之前市场过度悲观，太多人做淡睇淡，结果大户一个反手，大挟淡仓，情况跟6月港股挟升至22000水平相似，挟升根本唔需要理由，淡友冚仓带动。问题系挟完呢轮淡仓后，再有冇资金入场，令美股可以更上一层楼，目前仍有待观察。

继续塘水滚塘鱼困局

至于港股，喺6月放完一轮烟花，成个7月好明显就再无资金支持向上，反而系反覆向下，个个都系趁大市回升当日，就减磅走人。就连北水炒作嘅股份亦相当短瘾，今日买完，一两日走人，甚至上昼买完，下昼已掉转枪头走人。呢啲短线炒作，令港股处于上上落落格局，但问题系港股一直升唔起，系一众重磅股嘅大股东，都系趁高减持。

腾讯(00700)主要股东南非基金，已讲到明手上嘅货待价而沽，令腾讯近日股价表现死气沉沉；比亚迪(01211)主要股东股神巴菲特，亦将手上股份转仓到CCASS，即使暂时未见大手减持，亦难免惹起市场揣测。而阿里(09988)主要股东软银，就断断续续地搬货去CCASS，沿路减持，而软银手上持有超遆两成阿里股份，减持行动睇嚟有排搞。而刚刚美团(03690)嘅非执董沈南鹏，呢几日又再喺市场减持，套现咗12亿。

上述种种都系令到港股寸步难行嘅原因，再望一望港股7月份整体成交，缩水情况严重，唔少日子单日成交低过1000亿元，即系呢边面对重磅股被减持问题，一边又要面对无资金流入问题。咁嘅情况之下，试问港股有何本事向上突破，目前只能区间移动，继续塘水滚塘鱼嘅困局。

 

(徐狄怡，证监会持牌人)