古天后日誌｜外圍形勢嚴峻 港股拾級而下

9月7日，多雲，間中有驟雨，甚至有一兩陣雷暴，天氣仍然炎熱。美國債息急升至3.35%，美股繼續受壓，尤其科技股跌勢更為顯著，納指更連跌七日，而道指喺亞洲時段，期貨持續疲弱。標指跟納指仍受制反彈阻力，前者向3500進發，而後者有機會再下試10200點，兩者仍有一成以上下跌空間。

歐洲受能源問題所困擾，能源價格高企繼續推高通脹，歐洲經濟更為悲觀。為有效壓抑通脹上升，歐央行9份或加息0.75%。但歐洲債務問題嚴重，更有機會陷入債務危機，利差急升或嚴重干擾債券市場，甚至癱瘓債券市場，歐豬國債務爆煲或再度出現，或引發全球金融市場震盪嘅黑天鵝。

美匯升穿110，目前正向115目標進發，美元強勁其他貨幣自然走弱，人民幣亦唔例外，離岸價週二再跌280點子，直迫7算關口，在此之前阿爺已先下調外幣存款準備金率2%，睇嚟7算係阿爺要保住嘅底。不過美國正加大收水力度，只會進一步推高美元，阿爺要保力亦顯得吃力。

人幣續跌削弱資產吸引力

人民幣持續下跌削弱人民幣資產吸引力，A股自9月開局已見外資沽貨，噚日外資再減持13億元A股，踏入9月至今，外資累計已減持66億A股，雖然呢個月只係過咗一星期，且看餘下時間，外資會否回心轉意。資金外流令中國經濟更難捱，靠內需亦似乎無乜幫助，要扭轉目前經濟弱勢，似乎喺抗疫政策上，要作出適度調節，且看阿爺能否更精準抗疫，動軋以封區封城作為主要抗疫措施，只有令中國經濟百上加斤。

至於港股弱勢，似乎阿爺本身已自顧不暇，所謂國家隊入場托市只係一廂情願。而9月開局至今，大戶明顯部署好倉為主。而成交額維持薄弱，大戶操弄指數更易如反掌，散戶入場等同送羊入虎口。恒指刻下已跌穿5月低位，即係之前組成嘅雙底回升形態已走樣，如今有再度下試3月低位之嫌，且看3月底部，即18200水平能否形成三底反彈。但重點係要有資金流入配合，至於要扭轉目前困局，脫離熊市尋底走勢，起碼要回升至22000至22600點，港股先有返啲希望。

古天后

(徐狄怡，證監會持牌人)