獨家丨張偉文被指坐輪椅唱歌「慘不忍睹」全城齊估聲大大女歌手方俊有暗示

2022-09-09 09:00

69歲「靚聲王」張偉文（Donald）即使中咗新冠肺炎，仍然賣命完成3場《友情有義演唱會》。不過，對於Donald坐住輪椅仍然開Show，反應兩極，《星島頭條》日前就獨家報道有位好有「份量」，又聲大大嘅女歌星發表個人感想，「佢身體咁差仲要推佢出嚟赚錢，要佢坐住輪椅唱歌係慘不忍睹嘅事。」搞到呢位自強不息，殘而不廢嘅老人家非常嬲豬，咬牙切齒激動反駁：「我梗係嬲啦，我剩番碗飯，碗飯對我嚟講好寶貴，得一、兩份收入都唔放過我？我點樣做係我嘅事，我鍾意唱歌，鍾意唱到老呀。」

唔好嬲啦。

張偉文喺特製豪華輪椅上，跟方俊及姚煒合唱。

張偉文每場演唱會都感動到喊。

肥媽和黑妹姐第一場嚟咗後台探班。

張偉文和經理人方俊關係比父子更好。

方俊及方麗盈好照顧張偉文。

有歌唱嘅張偉文回復精靈。

元朗演唱會上座無虛設。

留言區掀罵戰
報道一出即成各大討論區熱烈探討嘅話題，好多網民為張偉文打氣，叫他加油，又大讚經理人方俊有情有義。都話網民講嘢從來唔使負責任，有網民指張偉文「玻璃心」，又留言：「其實一個失去自主能力嘅人，已經唔係屬於正常嘅人士，難聽講，到時出意外…」、「一個連自己都照顧唔到自己嘅人，仲要咁樣獻醜…」、「我覺得佢轉牛角尖。」、「曲解人哋意思啫，人哋不是幸災樂禍，只係覺得慘。」、「言者無心聽者有意。」等等，馬上被有同理心網民駁斥：「如果有一日你病到要坐輪椅返工，我同同事講，真係慘不忍睹，你會點？」、「本人覺得慘不忍睹四個字，絕對是用詞不當」、「我覺得佢唔要人同情，係要人支持。」、「冇口德人下場一定更慘。」、「搵食啫畀條生路行吓！」、「人哋坐輪椅要佢養？把口咁臭嘅？」甚至有網民話：「我反而覺得𠵱家企喺度唱歌嘅，大部份至係慘不忍睹！」

網民揪出「真兇」
另外，全城網民齊估誰是聲大大女歌手，誓要揪出「真兇」，嫌疑人物包括肥媽、甄妮、杜麗莎、鄭欣宜，甚至九唔搭八猜測喺新加坡定居嘅朱咪咪、冇關連嘅薛家燕、謝安琪、何韻詩及鄧麗欣。留言區充斥問號：「係咪肥媽？」、「應該唔係肥媽，佢同黑妹都一齊去撐場，我估係朱咪咪！」、「欣宜更有份量啦！」、「欣宜唔會係呢啲人，應該係老一輩嗰啲！」、「杜麗莎甄妮最可疑。」食花生指數相當高。
《星島頭條》即搵經理人方俊問兩句，眼見咁多有「份量」女歌手被拖累成嫌疑人物，他非常唔好意思：「如果事件影響到欣宜、家燕姐、甄妮、杜麗莎等感到非常抱歉…」記者發覺方俊冇提到肥媽個名，唔通講漏咗！？

嫌疑一號肥媽。

嫌疑二號甄妮。

嫌疑三號杜麗莎。

嫌疑四號欣宜。

方俊又表示：「我相信每個人想法唔同，嗰個係女歌手主觀嘅睇法，而偉文亦冇因為坐輪椅唱歌而覺得自卑，更唔需要用慘不忍睹嚟形容佢，佢積極面對人生，自食其力唱歌賺生活費，有咩問題？呢種不屈不撓嘅精神係值得敬佩。」他更強調張偉文唔係女歌星想像咁可憐，他反而熱愛唱歌，有歌唱生活有寄托。提到張偉文目前身體狀況，方俊指他雖然要靠輪椅出入，而且仲有腦退化，記憶力冇咁好，但唱歌技能已經入咗心：「呢樣嘢難唔到佢，若有機會，我一定幫佢安排演出。」