世界盃2022｜專欄：森巴軍團首戰唔「爾」踢

沙特阿拉伯喺首場分組賽爆冷擊敗阿根廷，令唔少人跌爛眼鏡。阿根廷上半場控制戰局，可惜連環越位，唔能夠拉開比數。下半場後防兩個致命失誤，結果付出沉重代價。艾爾認為阿根廷防守球員有啲輕敵，而球隊落後一球後，予人一種無心戀戰嘅感覺。踢逆境波心神恍惚，「亞軍廷」稱號並唔係笑料咁簡單。當然，沙特下半場防守紀律非常強，門將功不可沒，而前綫把握到僅有嘅機會，同樣值得一讚。

另一支南美強隊巴西首戰會對塞爾維亞。今屆「森巴軍團」前綫人才濟濟，除咗有尼馬，皇馬「孖寶」雲尼斯奧斯祖利亞同洛迪高高斯、阿仙奴嘅加比爾捷西斯同加比爾馬天尼利都表現非常出色，陣容夠晒亮眼。事實上，巴西連續十五場賽事不敗，氣勢當然好強。不過，巴西後防年紀偏大，馬昆奴斯哥利亞亦未知可唔可以喺首戰亮相，防綫硬淨程度爭咁些少。同埋，巴西前綫無乜高佬在陣，要破密集並唔容易。萬一落後緊嘅話，相信巴西會好難踢，情況有啲似阿根廷輸畀沙特咁樣。

今仗對手塞爾維亞喺上屆分組賽輸過俾巴西，今屆艾爾覺得球隊最唔同嘅地方，係換咗史杜高域做領隊。佢喺上年三月上任之後，將球隊改打三中堅陣式，加強喺中前場嘅壓逼，近廿一場賽事只係輸咗三場，當中試過兩次對葡萄牙一勝一和。雖然首席射手米祖域未知出唔出得，但仍有杜辛華荷域在陣，配合菲臘高斯迪嘅側擊，相信對巴西後防仍然有威脅。

沙特都可以爆冷擊敗阿根廷，無嘢係無可能！艾爾覺得塞爾維亞今屆有史杜高域領軍，應該有新一番景象，可以留意讓球「+1」下盤！艾爾

立即下載 | 全新《星島頭條》APP : https://bit.ly/3yLrgYZ