中小企貸款其實害了中小企 最後結局都是執笠｜湯文亮

政府推出中小企貸款以為幫到中小企，其實是害了他們，不少中小企老闆在疫情期間本來打算執笠，但無端端得到中小企貸款，生意可以繼續做，員工繼續有糧出。不過生意仍然是蝕本，中小企的貸款又唔係唔使還，就算還息不還本都係要還，捱到今日都捱唔到明天，最後結局都是執笠。

老闆冇私人資產就冇得講，如果有，那些私人資產恐怕早已輸乾輸淨。如果政府不推出中小企貸款，那些老闆在今日最低限度仍然可以擁有自己的私人資產，今日就乜都冇，中小企貸款是否害了中小企。

員工都會慫恿老闆借錢出糧

有人話我打橫嚟講，中小企老闆可以唔申請貸款，我認為有多少難度。首先有錢借點解唔借，就算老闆唔想借，員工都會慫恿佢去借，因為老闆借了錢員工有糧出，而且填張表就可以借到，點解唔借，結果老闆連副身家都冇埋。

不過話分兩頭，政府唔推中小企貸款又唔得，仲有咁多儲備，如果唔救中小企是會畀人鬧，當中包括冇糧出的員工。

有人話今次中小企貸款，最少有25%打水漂，就算打水漂我都認為值得。

湯文亮
惠集團副主席及行政總裁