阿碌开咪｜新特首冇气唞

疫情虽继续，拜年仍不停。当然，大家守法，只「手机拜年」，又或小组午餐相聚，继续支持饮食业「活下去」！

约四位退休资深政界及官界老友饭聚，讲乜？当然讲政情！尤其与下任特首有关的情报及分析。

高人A：「林郑表示中央请过佢去北京冬季奥运会，但佢推咗，宁愿留港应付疫情。好怪啫，就算天冧，行开两日有乜问题？若政府冇咗你唔得，咁就唔系上轨道管治啦！阿B，点睇？」

高人B：「对，任何特首，受到中央邀请，正路必飞身答应！尤其就快选下任。若林郑有意去马，岂会唔把握每一秒接近中央领导人？佢唔去，政治讯号清晰，下任应该是冇佢分。为免尴尬，故婉拒上北京。究竟是否如此，好快揭盅。阿C，你有乜观察？」

高人C：「政府宣布选举提名期，即中央有咗心目中人选㗎嘞。我都觉得换马机会高。不过，新特首将会做到有气冇碇唞！小弟做过局内人，当知一日未选到，仍可能有变数。故此，候选人根本唔能够埋班。三月二十七日投票完成，无论边个出任特首，都大大镬㗎。正路，十几个问责司局长全部到期下台，你想佢哋继续都未必个个愿意留低，故有机会大部分换马！呢个工程，真系人都癫。阿D，你话系咪？」

高人D：「当然。首先，新特首要约见心目中班底作游说。呢类见面，当然不会在冷冰冰会议室，而要约秘密饭局。每个位最少食两至三餐，因必会有人畀柠檬你食！单单食饭，都几十餐，死未？好嘞，到辛辛苦苦埋到班，但最后任命权又不在你手。即系人选不可以先辞职，以免两头唔到岸。做得司局长，肯定重要人马，无论在任何机构任高职，都应最少三个月至半年请辞啦下嘛。」

总结，特首由当选到组成新班底，然后落实名单交中央审批，获得确认，再通知新班子人选辞职，组织宣誓……三个月咁短？怎不做到冇气唞！但这只是漫漫艰苦长路的开始！

曾智华

阿碌开咪