阿碌开咪｜乜仲有人……

传媒生态近年剧变，这是事实。原因有N种，主要是科技飞跃进步，取代不少传统运作。不过，我发觉不少人过犹不及，乱噏「传统传媒必死」，指乃大潮流。　

最多听见人讲的似是而非谬论，正是：乜仲有人听电台嘅咩？乜仲有人睇电视嘅咩？乜仲有人睇报章嘅咩？乜仲有人睇书嘅咩？

对，今时今日，有咗互联网之后，电台、电视、报章及书刊，角色被分薄。

小弟经常出席各式传媒生态分享讲座，发觉绝大部分出席者，皆只懂人云亦云，也是猛指出电台、电视及报章应该瓜得，但又未谂清楚点解会咁或是否将会如此。

我通常抛出几个简单问题，以刺激佢哋对「乜仲有人XXX嘅咩」呢个讲法的思考。包括：

第一：个个话电台冇人听，执得。咁究竟系电台呢个媒介Out咗，定系如今电台节目水准渣波，故冇人听？朝朝几十万部车在路上行驶，若电台能提供精准新闻天气，再加充满娱乐性资讯性分析性节目，点会冇人听？请问究竟系内容出问题定载体问题？

第二：个个话电视冇人睇。其实与电台现象一样，你应思考是节目唔得定电视台传播唔得呢？大家睇串流平台也是用电视睇，故此，载体冇问题！当然又系节目能否迎合市场的问题！香港每晚仍有二三百万潜在观众会睇免费电视的，问题在你有好节目吗？与其话电视已死，不如话渣斗节目应死！

第三：个个话报章已死。对，报章印刷量跌是事实，当然科技是原因，另外，印报章成本贵，加上环保问题及政治问题也是原因。不过，报章仍远远未到——死。大家知否如今各大收费、免费报章及马经印刷量有几多？（冇人识答。）点解部分报章可以上网免费睇，但实体的仍可卖或派报以十万计呢？（又系冇人识答。）你哋可知如今一份马经，已可卖四至五万份？知唔知点解？

希望同学听完我的谬论后，刺激到思考，增强分析能力，戒绝人云亦云。

曾智华

阿碌开咪

编按原题为《仲有人XXX嘅咩？》