阿碌开咪｜究竟点染返嚟？ 两个有一个中

昨晚讲到去做肠镜及胃镜，之前一晚服泻药，结果第一包冇效，到凌晨四点食第二包才开始「万马奔腾」，搞到清晨六点半才可与马桶说再见。但已差不多要到医疗中心了。

瞓上手术牀前，护士循例解释一切，并嘱咐签下「生死状」（即系，老友，你自愿㗎），喂！边有得拣呀，当然火速签啦。

剥光猪后穿起纸裤瞓上牀，护士细心盖毡，然后等呀等。三十分钟后医生到，麻醉师开工，先唧几滴镇静剂入口，再在血管注射麻醉。唔使五秒，已失知觉。似乎时间冇乜过就醒返。

医生乃非常「熟手男工」，做咗几十年，半小时内乜都搞掂：「休息后到应诊室见我啦！」

效率之高，再次觉得，悭其他使费，都应在需要时搵私家，太大分别了。

穿回衣服，叹咗杯免费热朱古力，体力恢复多少，再去见医生。原来短短半小时，一切已经准备妥当，包括手术后详细报告、八张相片、一只手术过程电脑碟……真犀利！

「曾先生，你冇瘜肉（十年前有四粒，十年后竟然冇，都几奇！）。不过，胃镜显示，有幽门螺旋菌，要食一个Course药，包括抗生素，然后再返嚟覆诊啦。走得㗎喇，下次见！」

返屋企，速速上医疗网，查查乜野系幽门螺旋菌，究竟点嚟嘅，染上又会有乜后果？

唔睇犹自可，一睇大发现！原来根据中文大学医学院研究，全球有四十几亿人感染咗呢只菌，而香港每两个人就有一个中，比率超过一半！哈，点解冇人涌去求医呢？因为……大部分冇感觉、冇徵状，根本唔知！

咁几时会知？第一，好似我咁走去做胃镜，咪发现罗。第二，感觉胃胀、胃气多、突然消瘦、胃痛或食欲不振，到时搵医生验，即知。若长期唔理，会诱发慢性胃炎，导致胃溃疡及出血。再拖呀拖，就有机会变成胃溃疡或胃癌。

呢只菌点染返嚟的呢？通处都系，防不胜防！结论，快啲医，成功治愈者翻发机会好低。

曾智华

阿碌开咪

 

编按原题为「两个有一个中的菌」