【独家】方便聋哑人士推透明I-SEE口罩　家燕姐祥仔美仪浚霆赞好无障碍沟通

新冠肺炎疫情持续1年多，市民已习惯长期戴口罩防疫，但聋人及弱听人士就相当不便，因为他们要透过读唇、手和表情用来沟通，有见及此，慈善团体福幼基金会去年便研发出「防雾透明窗医用口罩（取名为「I-SEE口罩」）」。身为执行董事会董事的阮兆祥（祥仔）日前偕薛家燕（家燕姐）、江美仪和陈浚霆，戴上I-SEE口罩体验无障碍沟通，家燕姐不忘搞笑自夸嘴靓笑容又靓，搞到祥仔都忍唔住哄前索吻；而美仪就爆陈浚霆怪癖，疫情期间锺意睇人「离罩」！采访：谭壹致、袁东亮　场地：六公馆

为抗疫戴足一年口罩，自称「靠把口及样搵食」的家燕姐，笑言一向嫩滑的肌肤都因为戴口罩焗到生暗疮；同为电台DJ的阮兆祥表示开咪时，因声音被口罩「隔住」令效果朦胧，他说：「有时10个人坐长枱开会，大家遮住口都唔知边个讲嘢，正常人沟通都有困难，更何况聋哑人士呢？ 有时佢哋要靠手语配合口形先可以准确地表达意思，所以疫情期间好多聋哑人士喺沟通方面遇到困难。」

因此，祥仔透露去年福幼基金会研发了I-SEE口罩，方便聋哑人士同人沟通。访问当日，戴上该款口罩的家燕姐笑道：「好欣赏各位为呢个社会、香港人做友善嘅嘢，呢个口罩真系好有用，你哋睇唔睇到我个嘴？（祥仔：睇到，好Sexy，忍唔住想咀落去。）我个嘴系靓，但净系睇我个嘴，因为唔系大众都学过手语，好似萧芳芳本身有弱听，同我哋沟通系睇口形，所以戴咗呢个口罩就方便好多。」

习惯睇人口形的江美仪直言戴罩后经常听错嘢，又不肯定别人是否跟自己说话，这段期间惟有靠估，陈浚霆笑谓：「所以我会等几秒先畀反应人，变相学识做个好好嘅聆听者。（美仪：即系我平时唔听你讲嘢？）唔系，举例啫！」深明听障人士的苦况，美仪也庆幸本港终推出I-SEE口罩，她说：「除咗听障人士外，我哋都可以用嚟同佢哋沟通，加上好耐都冇见到大家笑，戴呢个口罩就可以见多啲笑容，多啲正能量。」陈浚霆就大赞可调节耳带长度设计，「见啲人唔识拣口罩，发生离晒罩嘅现象。（美仪：你唔系锺意睇人离罩咩？）呢啲嘢唔好喺度讲，但呢款口罩无论好似你块面咁Camera face，或我咁大块面都Fit到，好贴、好舒服！」