【头条独家】花姐凑仔苦与乐（四）之 跟姜涛AL AK讲对唔住

花姐（黄慧君）同《头条》讲凑MIRROR和ERROR苦与乐去到最终回，花姐大爆凑一班囝囝遇到最大困难外，提到要同姜涛、AL（卢瀚霆）同AK（江𤒹生）讲对唔住时，更忍唔住讲到眼湿湿。另外，花姐又提到对MIRROR和ERROR未来期望；又爆带过几个囝囝去睇塔罗师预测未来；仲有花姐跟16个囝囝想话的心底话，真系有好多感动位㗎！撰文：杜淑霞 摄影：谭壹致

花姐觉得做经理人以来，面对最大困难？

花姐说：「每个artist都有迷茫期，MIRROR迷茫期特别频密，可能得到嘅嘢好易，好快大家好锺意佢哋，好快成绩好好，会令佢哋突然间迷失，佢哋又未去到嚣张，但系好自我，系令到我好困扰，当我同啲同事一发现，就会掹返佢哋返嚟话畀佢哋听，从头分析件事，佢哋就会返番初心度再努力，呢件事不停困扰紧我，因不同成员都会发生，但冇话佢哋唔啱，呢样好嘢正常。（怕外界影响咗佢个判断？）系，暂时系冇发生过，好惊某啲嘢影响到某啲成员或者成队MIRROR变成咁，MIRROR嘅可爱系最初嘅努力，变成咁佢哋已经冇价值。好彩佢哋16个系班好善良嘅人，嗌完交后会体谅大家，佢哋亦好愿意重新了解呢件事，令我哋继续行落去。」

花姐最想对那一个成员讲对唔住？

花姐说：「我对姜涛同埋Anson Lo（卢瀚霆）特别严格，因为佢哋好容易玩『创』个心，唱开只歌会轻视咗，同埋姜涛大家对佢要求好高，更加捉住佢每样嘢，Anson Lo跳舞叻，但唱歌唔系好好，要捉紧佢。我对佢两个严格会令佢哋难受，佢哋会话『佢做得我唔做得嘅』，但我系好想佢哋好！知道有令佢哋唔好受，要同佢哋say sorry，原谅我个人系咁粗鲁，讲嘢大声。」

花姐说：「另一个对唔住一定系AK（江𤒹生），我有同佢讲过好想见到佢攞叱咤新人奖（眼湿湿），不过呢个世界唔系想要就一定有，宣布咗第三名系阿Lo时，就知佢冇啦！我冲咗去后面喊，见到电视机佢个样，佢唔开心咗一晚，真系好对唔住，系咪我可以做好啲！？再用力啲推佢只歌就可以完成呢个梦呢！？新人奖真系一世人攞一次！系咪我plan咗3个出嚟自己人打自己人呢！？我都唔开心咗好耐，反覆喺度谂，呢件事哽喺我心入面好耐。嗰晚好多人走埋嚟恭喜我，其实我笑唔出，我对姜涛都唔公平，姜涛走埋嚟我戥唔到佢开心，某程度我对阿Lo唔住，特登约咗阿Lo完骚后去个朋友度聚，仲预备咗千字文send畀阿Lo，我谂住佢攞唔到会唔开心。人生几矛盾，最终AK唔开心，阿Lo都有同我去个朋友度，唔系我安慰阿Lo，系佢哋安慰我喺度爆喊。虽然呢一关对我同AK好难过，呢一关令到我哋大个咗，如果再有人攻击AK我会出声，唔好用佢嘅真性情攻击佢，佢嘅努力系值得拥有。」

花姐对MIRROR及ERROR仲有何期望？

花姐说：「MIRROR好希望唔再系大家净系睇佢哋系一个团体，好希望MIRROR系12个个体，所以点解系『all in one one ＆
all』因为佢哋12个好好睇，最想佢哋每一个都有呢行生存价值，搵到自己独立生存方法好紧要，亦都可以帮佢哋有自信心，令到佢哋MIRROR有更多光芒。ERROR出嘅歌少啲，但系佢哋创作能力好高，佢哋以前不停咁样做综艺，间唔中出歌，我希望佢哋有自己特色嘅歌，佢哋好锺意啲歌反映社会，好希望佢哋继续做，佢哋嘅嘢好贴地好中，系可以帮到香港人，同埋好希望保锜快啲出番嚟。」

花姐手上戴了几条水晶鍊，究竟她做经理人后有冇搵人指点过迷津？

花姐说：「我以前后生有信水晶，有去睇吓相，后尾就冇。我做经理人后突然有日戴水晶，对自己冇晒信心，𠵱家戴就系求安心。不过有次好无聊同咗某啲成员去睇塔罗牌，佢同我哋讲2022年会好，好开心，total应该有8个成员睇，但净系批Edan（吕爵安）2021年会好，后尾Edan出歌我先醒起，真系2021年喎！希望个师傅讲嘅嘢系啱，我又唔会信晒，佢话我哋2022年好就唔努力，但会有个动力唔好放弃啦！（师傅有冇讲你适唔适合做经理人？）我其实成日都嗌辞职㗎！做经理人唔适合我，鲁生（鲁庭晖）同金生（金广诚）都觉得我烦。我有问佢应唔应该辞职，佢就同我讲份工令我有好大名利，不过你唔享受，你追求紧另一样嘢，跟住我话我应唔应辞职，佢系唔赞成，佢话我老细系唔会畀我咁做。我唔要咩名利，16个仔有人识就得，我静静喺幕后做嘢可能帮到佢哋更多。」

花姐跟MIRROR及ERROR 16个囝囝有何心底话想讲呢？

Lokman（杨乐文）＠MIRROR
花姐说：「Lokman加油！我相信你喺电影方面有好成绩，我哋差啲啲机会啫，我哋好快畀人睇到你嘅演技。」

Anson Kong（江𤒹生）＠MIRROR
花姐说：「如果你再发脾气黑面就五嚿水，今次冇得讲价！」

Anson Lo（卢瀚霆）＠MIRROR
花姐说：「我同佢讲啲嘢好肉麻，搞唔掂，Love you！」

Ian（陈卓贤）＠MIRROR
花姐说：「大个仔啦，生性啦，对女朋友好啲呀！」

姜涛＠MIRROR
花姐说：「姜涛你唔可以再唔听话，你唔可以再同我嗌交吓，同我拗呢样得呢样唔得咁样，我哋要和平解决件事，OK！」

Jeremy（李骏杰）＠MIRROR
花姐说：「我觉得你要相信吓自己，你𠵱家未得到你想要嘅嘢，但系唔代表你𠵱家未得到系唔好嘅事嚟，我觉得天会安排到，当适合时候机会就会畀你，所以唔使咁心急。」

Alton（王智德）＠MIRROR
花姐说：「你其实好正，同你倾偈系好开心，你讲嘢充满综艺感，你唔应该再固执喺以前嘅梦想度，你最紧要做好综艺，我相信你喺综艺嗰度你会有好好嘅成绩。」

Tiger（邱傲然）＠MIRROR
花姐说：「我爱你！」

Edan（吕爵安）＠MIRROR
花姐说：「真系请食饭呀！你只MV过咗两million，你都未请食饭，快啲呀！」

Stanley（邱士缙）＠MIRROR
花姐说：「我成日同Stanley讲你唔需要MIRROR，你有条好清楚自己嘅路，你要喺戏剧发展，就算你唔系MIRROR入面最独当一面，大家最睇到你，其实鲁生（鲁庭晖）金生（金广诚）同我都睇到你喺戏剧方面好努力，你未来日子会有好多机会，加油！」

Frankie（陈瑞辉）＠MIRROR
花姐说：「我觉得Frankie太被动，你要再主动啲，我知道你可以做到好多嘢，但系你唔主动会令到人哋睇唔到你，因为机会唔会有好多，你要把握每个机会就要行出嚟畀人睇到你，唔好吓吓都让个机会畀人。」

阿Jer（柳应廷）＠MIRROR
花姐说：「我讲过秘密畀你听，我哋成个AM team会将MIRROR排1至12位，突然你近排喺我心入面排咗第一位，唔好讲畀人听。」

肥仔（梁业）＠ERROR
花姐说：「肥仔我想话其实ERROR系好多谢你，一路都好包容我，我摆咗好少时间喺ERROR度，全靠你管住佢哋几个人先可以咁受大家欢迎，所以你要继续努力，帮我继续照顾佢哋几个。」

阿Dee（何启华）＠ERROR
花姐说：「其实阿Dee都系其中一个要讲对唔住，阿Dee喺演戏方面应该要更多机会，我冇做到一个好好嘅经理人帮佢搵到好多演戏机会，所以我亦都要同阿Dee讲对唔住，但系我觉得呢个系运气问题，一个人唔会完全一世都冇运气，我觉得总有一日大家会睇到你。」

193（郭嘉骏）＠ERROR
花姐说：「虽然大家觉得你系一个唔需要有实力都受欢迎嘅人，因为大家都觉得你系个冇实力但系有gimmick嘅人，我觉得咁样唔够令人继续锺意，你要无论喺跳舞唱歌同埋做戏进步，我近排见到你喺ig post咗你学唱歌，我都好安慰，肯努力，我唔希望再见到《全民造星》嘅你。」

保锜（吴保锜）＠ERROR
花姐说：「我好欣赏你做音乐嘅坚持，加油呀！我希望有一日我可以将你嘅音乐带畀更多人听。」