【独家】祖蓝闹得啱 长期唔识释放情绪 冯盈盈压力爆煲拍《逆天》喊戏瞓唔到

做演员投入感情难，识抽离一样唔易，压力有时会大到爆晒煲！冯盈盈最近参加《好声好戏》，为剧集《巴不得妈妈》配音时喊到猪头演绎，不单得唔到原本演该角的汪阿姐欢心，指她用错感情，评判王祖蓝更狠批「我好担心你适唔适合做呢行」、「你嘅压力盖过你嘅实力」。其实每次演戏盈盈都畀自己好大压力，旧年《反黑路甲人》已向《头条》自爆因压力，情绪失控收工仍狂喊，而她拍热播的《逆天奇案》时，原来都试过对住视帝陈展鹏拍喊戏，压力太大紧张到瞓唔到，睇嚟盈盈要改好啲懒音之外，演技方面都要下啲苦功先掂，唔系随时搞出个情绪病喎！撰文：杜淑霞 摄影：张咏森 发型及化妆：Kayo Wang 服饰：LONGCHAMP、THIALH London

啱啱播完的《好声好戏》顺利由表现稳定的陈自瑶夺冠，而出名懒音劲的冯盈盈虽然年前搵前报幕员罗山教正音，懒音情况改善咗好多，但依然落败，全因畀自己太大压力，完全控唔到情绪，汪阿姐都评她，「你感情系好丰富，但好似有少少用错咗。」祖蓝除了狠批她「我好担心你适唔适合做呢行」、「你嘅压力盖过你嘅实力」更爆她为了这场戏配音，竟然由早上开始喊到录影，其间搞到生人勿近，更指「你嘅压力大到我都有压力」，仲话令他怀疑自己应唔该搞呢个节目。



其实盈盈演戏时唔识释放压力都唔系第一次，旧年8月播出《反黑路人甲》，盈盈接受《头条》访问时，就自爆首度担正女主角畀自己超大压力，搞到拍喜剧竟然戏里戏外都爆喊，「大家开心睇喜剧嘅时候，其实我系喺镜头前不停喊，返到屋企背人就流泪啦！喺现场对自己有更大期望又忍唔住喊，唔知系咪我对呢套喜剧太投入，系拍剧以嚟喊得最多嘅一次。」

正音搵谭嘉仪学唱歌


讲到最近的新剧《逆天奇案》，盈盈一样畀压力影响住，首度去泰国北碧府拍外景，面对陈展鹏演喊戏已搞到她超紧张，「最难忘嘅一场戏，喺泰国嘅外景，讲我哋喺条火车桥上面，喺日出初起嘅时份，我同展鹏一场好重要嘅情感戏，我又喊佢又眼湿湿，总之好似摊牌咁嘅嘢，拍嘅时候要就埋个日出喺后面，晨早4点要到现场，你估我要几点化妆！？冇瞓咁滞，前晚又好紧张讲到场戏咁重要！」盈盈坦言日出时间太短，要一take过完成唔容易，「工作人员好早去set晒嘢，又特登截住条桥，嗰条桥系有火车经过，喺外地拍摄时间好紧迫，所有嘢都系钱嚟，咁多人力物力好庞大，嗰吓表演要好准好到位。成唔成功？系成功嘅，出嚟个话面仲好靓，有晒景同火车，喊得出真泪水嚟唔系眼药水嚟。」盈盈又爆另一个紧张位是怕阻住人收工，「嗰场戏系泰国外景最后一日，嗰日展鹏拍完就走得，Phoebe（太太单文柔）都过咗嚟探班，展鹏book晒之后同老婆去曼谷开开心心玩，如果我喊唔出，就耽误咗时间，阻住人哋去旅行玩都有啲压力嘅。」



懒音改善咗盈盈，更自爆终于够胆搵谭嘉仪学唱歌，「我喺选美之后都有学过唱歌，但系好快放弃咗，因咬字未搞掂，唱容祖儿《世上只有》第一句就系『望着你讲』，4个字有3个字好难，唱咗一个月都仲系呢四个字，好灰心放弃咗，依家就唔使咁多心机去搞掂字，可以学吓啲keep到啲音准同拍子。」不过她预告会挑战郑欣宜首《@princejoyce》，「中间都难有啲位好高音㗎！希望大家可以期待吓我个成果唱成点啦，最难系个beat，希望出到嚟唔会变笑片。」不过盈盈学正音同唱歌之馀，似乎更加需要学好演技，学祖蓝话斋情绪能收能放先至算系好演员。



除了这场戏难，今次《逆天》盈盈为了来自委内瑞拉的骇客「Ana」角色，要连学多种语言，「呢套剧简直系考我语言天才，话我喺外国返嚟同外国人又要讲英文，要讲到好似外国返嚟ABC咁，仲要学西班牙文又要唱埋歌，讲我搵咗位尼泊尔朋友，去到拍摄现场又要加几句尼泊尔文，即场跟住学要好流利好地道，仲有学泰文，因为去泰国拍外景，我同嗰度啲人沟通系讲泰文，仲要识跳埋佢哋啲民族舞，我练咗几堂先至飞过去，所以我为咗呢套戏学咗好多新嘅语言同新技能，好似去咗个训练营系度挑战自我。」