【独家】食完唱馀波被老友诬蔑不忠致分手 麦贝夷嬲爆裕美恩将仇报

35岁麦贝夷(Karene)被「贱男」旧爱食完唱风波仲有后续。之前无辜「被第三者」的裕美力证麦贝夷跟由佢介绍的Edmond拍拖后，仍借住做Happy Live跟翟威廉维持「炮友」关系。麦贝夷不忿被屈，隔空反击裕美恩将仇报，当年她力挺呢位好姊妹冇背夫偷食黄子恒，发梦都估唔到裕美放冷箭，多次喺背后生安白造，向Edmond指她不忠，搞到两人分手收场。采访：方骞平 摄影：张咏森 场地：Wow Fitness

麦贝夷早前接受本报访问时委屈哭诉俾「贱男」旧爱「呃食」，好彩做女仔识得保护自己，要求男方戴避孕套进行安全性行为，不过，呢次经历hurt到要睇精神及心理医生，而医生建议她要多做运动舒展身心，切忌屈喺屋企胡思乱想。加上经理人有意今年帮她出一本写真书，所以近排Karena频频去健身室，而拥32C坚挺上围的Karene嫌pat pat同大腿线条唔够靓而狂操下身，她辛苦到猛叫：「oh my god！好痛啊！」

认旧爱曾问跟翟威廉关系
对于裕美曾向本报爆大镬，话睇唔过眼Karene对Edmond不忠，仲话赔乜都得力证麦贝夷同Edmond拍拖期间仍持续约「炮」。麦贝夷坚持裕美呢个指控得啖笑：「Edmond系由阿美介绍嘅，之后我哋一齐住，我有照顾佢两老，有时间会做家务，学煮嘢畀Edmond食，而拍拖期间我系有上Happy Live，因为系工作，Edmond系知嘅，当时佢又话ok，咁我咪去罗！」另外拍拖初期，Edmond亦曾因她跟翟威廉食Pizza的报道而问过两人关系？Karene当时答：「唔系啩！只系开live前去食个Pizza啫，翟威廉系个几gentleman嘅男仔，如果你唔放心，咁介绍你识呀？」之后Karene就介绍咗Happy Live嘅人畀Karene识，「有时完咗Happy Live，Edmond仲会嚟接我走。」麦贝夷补充。

裕美生安白造精神有问题
Karene愈讲愈伤心，「有次迟咗放学，零晨12点几先返到屋企，Edmond问我点解？当时仲唔知有人从中挑拨，搞到佢怀疑我！去到闹分手时，Edmond就质问我：『有冇对佢不忠？』佢坦白话系阿美同佢讲，指Karene有其他男仔，嗰一刻我吓一声呆咗！真系好hurt，好失望，点解我攞个心出嚟同阿美做朋友，佢要喺背后做呢啲事呢？」被问到跟Edmond的性生活是否唔太协调？麦贝夷认真谂咗阵话：「Edmond系健康正常男人，我同佢冇呢个问题，我性需求唔大，唔使要搵炮友！而且当时我仲要做埋幼稚园代课老师，兼要照顾佢两老，都几攰。」她反指裕美有精神病：「呢件事不实到一个点，但佢又好肯定咁，几激动咁讲出嚟，仲要塑造到我系一个好随便嘅女仔，唔知有乜嘢刺激到佢咁做，佢精神状态系咪好唔稳定呀？我根本冇做错嘢，佢锺意点讲，我控制唔到，最惨系令到妈咪担心啫。」