【独家】花三年自资六位数出歌 林德信搵林子祥拍MV有畀利是

36岁嘅林德信(Alex) 自资6位数以独立歌手身分，推出国语新歌《爱没有理由》，Alex坦言今次投资很大，大到可以用呢笔钱买可升值嘅名表，但他无悔，除咗因为太锺意呢首歌，更希望藉住新歌，能永远代表到他是独立音乐人的身分，会更加难得。采访：方骞平 摄影：谭壹致 化妆：Jess Yung 发型：Negan Leung @ haircorner 服装：Loro piana,Washi jeans,Soft Serve and Sake 场地：Cubus 28 x月下酌

林德信的《爱没有理由》为求做到完美，足足花咗3年时间制作，除咗要夹音乐大忙人恭硕良时间外，其后又改咗少少唱法，后段要他唱得好爆及好高音，用以代表他对件事的坚持，Alex再花时间去练，单系录音都搞咗一年，跟住MV筹备咗半年，同埋要做后期电脑特技。

阿爸冇资助
Alex以往拍MV只会随意用手机拍摄，同今次咁大阵仗相差好远：「新歌好有故事性，要有多啲电影感，计计埋埋花费6位数字，足够用嚟买只名表！𠵱家真系明白晒做音乐原来系有几难，所以我唔会首首歌都咁做。」当问到系咪有信心投资喺自己嘅音乐上，升值潜力更胜名表？他大笑说：「唔敢咁讲！投资喺自己作品度系开心嘅，尤其每次有作品出嚟，大家会睇到唔同嘅我。」他声称daddy林子祥冇开声喺金钱上作支援：「我又冇问佢，佢相信我喺能力范围应付得到。今次我邀请佢拍MV都有封返利是畀佢㗎，虽然唔系大封，但佢都开心嘅！」