【独家】入行要减肥做瑜伽辛苦到爆粗 ATV阿仪自称靓所以爆红

37岁黄花闺女薛影仪凭独特样貌及气质挑战今届亚姐，虽然入唔到围，但红爆网络，网民齐集气令「气质仪」成功获ATV签约两年，月入有4位数仲有佣金添。对于被封亚视一姐，仲有埋应援会！阿仪信心满满说：「可能我靓！」对于网民的支持，阿仪最开心有Fans留言：「我爱你！」说毕还展露激罕招积笑容。采访：方骞平 摄影：梁志明 场地：Meg Latin Yoga@金巴利中心

阿仪被Fans捧为「阿仪不红，天理不容」，多job多都爆灯，除咗做宣传，仲要唱live、拍美容广告、迟啲仲会拍埋戏。今次《头条日报》记者安排本身都几厚肉嘅阿仪去挑战做瑜伽，见佢做得都好吃力，搵食系艰难㗎嘞。

辛苦玩到透晒大气
当日导师先指导阿仪做一啲基本热身动作，再趴低身贴地爬行做舒缓脊髓，最后向较高难度进发就系玩高空瑜伽，教她做正身及反身倒吊动作，可惜阿仪手脚唔协调，不时挞低喺地席上，更做到透晒大气，要由经理人示范及打气鼓励，再同导师夹手夹脚协助阿仪完成动作。期间阿仪不停讲：「哎呀！真系攰，哗！真系攰到我！」屡败屡战后，一头乱发嘅阿仪忍唔住细细声爆粗：「系罗，真系好x攰！」笑爆全场。问到能否捱得住娱乐圈咁艰辛的工作？她细细声：「捱得住嘅，再嚟啦，但仲未拍完嘅？」事后记者问到她对讲粗口的睇法？她说：「系罗！啲人(留言)讨厌罗！」记者反问：「但你自己都爆粗喎！」她却不语，然后发出哎呀声，未答完就走去搵手机，搞到公关都要提醒她说：「阿仪，礼貌啲！」

读到中五成绩唔讲
对于网民喜欢阿仪有纯真一面，她信心返晒嚟：「系啦！佢哋觉得我外表好罗！」仲大大声说：「我都有信心(发展)，我个样都唔算差，有啲人靓过我，有啲人丑过我，身形有啲人肥过，(下删百字)。」再问觉唔觉被人取笑？她说:「吓？唔知佢哋，唔会觉得，我个人乐观。其实我瘦10磅就ok，唯一有黑眼圈，下面棚牙有啲疏。」至于被指双乳下垂？她即否认：「我觉得ok，系啲网民乱讲嘢。」由于阿仪常问非所答，她的智商同样受关注，对此她反问：「仲咩呀？(读书OK？)系呀，我喺元朗乡中读到中五，会考成绩系点？唔讲得啦。」


TVB挖角都唔会去
问到觉得自己红唔红，阿仪坦言：「啲fans话我红罗，(啲人话你红过姜涛)系呀！我唔知佢哋呀！各人有各人睇法罗！可能睇我外表靓。」她又自爆有fans要求跟她合照及送花胶燕窝。她又说可接受着泳衣拍戏，但唔接受拍牀戏，咀戏就视乎剧本，但私下可接受婚前性行为。今年4月她曾投考TVB演艺训练班不获取录，问到TVB系咪跌眼镜？她即投诉：「系罗唔知佢哋呢！嗰日有千几人面试，由朝等到晚嘥时间，乐易玲只系问咗我姓名、年龄及职业，第日TVB撬我都唔过去，等咁耐都唔去啦。」