【独家】马德钟陈炜齐催婚兼催生仔 汤洛雯祝福黄心颖同泥鯭
2021-08-05 23:56 
两年前汤洛雯(靓汤)取代黄心颖拍梅小青退休作品《法证先锋IV》频频NG，时至今日靓汤有视帝男友马国明教路，演技刮目相看。新剧中她以女一姿态和「民选视后」陈炜齐齐斗戏，靓汤七情上面演技大爆发。有医生男友爱锡的陈炜分享经验之谈，叫靓汤快啲结婚唔好错失生仔黄金时间。采访：方骞平 摄影：梁志明
TVB新剧《双生陌生人》中两位女主角汤洛雯同炜哥日前晚上喺九龙城码头拍外景，剧情讲靓汤为咗营救爱郎马德钟，爆樽指向翟威廉条颈，靓汤癫到青筋都现埋，非常入戏！不过，被汤洛雯用糖胶酒樽「行」住嘅翟威廉就带点淆底，因为靓汤出名论尽，就算喺农庄拍戏都会唔小心踩到斧头手柄，搞到成把斧头凌空飞起，好彩就冇伤人。
拍住拖先
曾疯传靓汤同马明本月秘婚，靓汤强烈否认：「我紧接要入新组喇！都系拍住拖先，冇话一定要结婚，都要一啲时间(了解)𠵱家未得住。」靓汤仲自爆同马明冇交嗌：「我好跳掣，但对手唔系咁，佢冇乜情绪起伏。」炜哥以过来人经历有感而发，同马神一唱一和叫靓汤快啲结婚，炜哥话特别唔好错失生仔呢段黄金时间。马神话最好攞埋视后双喜临门；炜哥附和：「佢咁靓女，生女会好靓。」对于昔日好友黄心颖被影到同绯闻男友泥鯭放狗，靓汤带点尴尬说：「感情唔讲太多喇(祝福佢哋？)我个个都祝福…」至于喺旁边「食花生」嘅马神就忍唔住阴阴嘴笑。
最新回应