古天后日志｜利率升而经济唔升 银行股难有作为

5月16日，大致多云，初时有几阵骤雨，气温有所下降。上周五美股回升，三大指数高收，道指升466点；标指跟纳指则分别升93点及434点，反弹力度唔错。美股反弹嘅原因主要系债息有所回落，10年期债息回落至3%以下。虽然美股反弹，但自3月开始，入场资金仍然以散户为主，相反机构投资者喺同一时期却继续减持美股。换句话讲，呢一轮美股反弹，只系超卖后嘅技术反弹，暂时好难讲得上系转势，低位有捞货，或者仲有蟹货喺手，只有继续观察，再趁反弹去整理手上持股，目前都未系可以太过进取，大手进场嘅时候。

至于港股亦随外围反弹，不过喺港元跟人民币仍然疲弱下，入场资金唔算多，跟3月中从18200水平反弹至22400嘅时候，成交激增至3000亿元不可同日而语，估计呢一轮反弹，能够重上10日线(20287)及20日线(20506)已经算唔错。要反弹至50日线(21102)暂时睇怕唔够资金配合，要重上22000水平，更加系遥不可及。呢一个月港股都系继续上落市格局，暂时嘅移动区间大约系19000至21000水平呢2000点之间上落，大家手上有货，都要趁反弹减持。

中美欧三大经济区现不确定性

环球步入加息周期，唔少人都以为银行股可以随住息率上升而升风破浪，结果出嚟当然未如人意，讲到底都系银行息差喺过去十几年嘅减息周期之中一直收窄，即使目前息率回升，银行资产回报率亦见唔得有几吸引。虽然利率上升确会令息差增加而提升资产回报率，但可惜经济未能向上，甚至有陷入衰退风险之际，不仅贷款需求未见增加，坏帐风险上升，对银行盈利反而会有负面影响。

喺过去几个月，虽然欧美利率趋升，但因为中美欧三大经济区出现不确定性，美国早前公布的首季国内生产总值(GDP)收缩1.4%，欧洲因受俄乌冲突所造成的高天然气价格影响，经济衰退压力增加，中国则因抗疫有机会导致消费及出口减慢，而影响经济增长。即系要支持银行股盈利回报上升嘅两个条件，目前只系合符咗一个，另一半经济增长目前仍落空。呢个就系点解银行股喺本轮加息潮之中，表现强差人意嘅原因。

古天后

(徐狄怡，证监会持牌人)