独家丨郭玥彤搬独立屋创造3千尺儿童乐园𡃁模靓妈疫情冇得带囡囡出街玩

2022-05-25 07:00

35岁郭玥彤（前名郭颖儿，Celia K.）2010年以𡃁模身份出道，出过写真拍过电影，2016年跟生意人李冠锋结婚并淡出幕前，先后诞下3个女儿。早前她先后亮相ViuTV《妈咪Kingdom》及TVB《360秒人生课堂》节目，分享由𡃁模变成3女之母的心路历程。凡事以三女为先的Celia K.将3千多尺独立屋，变为儿童乐园，虽然全屋被玩具同小朋友物品侵占，但可以跟囡囡一齐成长，Celia K.坦言目前的生活相当开心。

采访：杜杜摄影：沈健程

Celia K.话平日3个囡囡最爱黐住爸爸，连食嘢都要坐住大髀，造就这次影全家福机会。

2012年，Celia K.以𡃁模身份，推出首本写真集《Missing Celia K.》。

2016年，Celia K.跟生意人李冠锋结婚，并淡出幕前。

节目播出后，有网民留言鼓励Celia K.，「最感动有网民话，『你可以将一啲我哋认为好难堪嘅嘢，用幽默方式表露，你真系冇所谓去分享，真系好值得鼓励』，谂返系有啲难堪，但题目系用𡃁模嘅人生阶段去讲，冇后悔嘅，中间有少少唔开心同迷惘，但如果可以影响到一啲同路嘅妈妈，都系做咗件好事。」

早前Celia K. 获好友Bob邀请参加《360秒人生课堂》，老公都有现身支持。

学识享受做阿妈

Celia K.婚后6年来不断经历怀孕、生BB和凑BB过程，她承认过程很迷失，「以前做𡃁模，会有导演教你，有人从旁协助你，或者你可以睇其他人攞经验，但系做妈妈要自己汲取经验，中间有段时间唔知自己做紧咩，长期瞓、食、生、凑咁样，好迷惘，冇晒目标，觉得一世就系咁。」

Celia K.是3女之母，包括5岁长女李明芯、3岁次女李明珈及1岁幼女李明臻。

Celia K.跟丈夫位于2楼的主人房，已算全屋唯一没有小朋友物品的地方。

不过Celia K.见到老公凑小朋友好快上手，亦学识享受跟小朋友一齐成长，她亦开始学习，搵到做妈咪乐趣，亦从囡囡学识某样嘢获取成功感。「以前喺工作上有成功感，𠵱家可能系同佢哋相处，或者教晓佢哋某啲待人处事。」现在Celia K.凡事都以3个女行先，shopping亦是，「买佢哋啲嘢买得最开心，去旅行第一时间搵大型嘅连锁婴儿同幼童嘅铺头，爆买几箧返嚟，换嘅现金第二日就冇晒，冇自己份已经成为习惯。」

1楼是小朋友睡房，以及主要玩乐空间。

1楼的玩乐空间，设有两个囡囡最爱的波波池。

开频道拉近关系

疫情下，Celia K.与丈夫为小朋友搬到屯门3千尺独立屋居住，「疫情第一波我哋住喺一个屋苑嘅顶楼，因为要搭𨋢，每日要经过50几楼会好危险，加上佢哋冇乜活动空间，日日困喺屋企就好癫，先生就提议物色一间屋仔，可以摆到我哋咁多人，又可以有啲空间畀佢哋游水、踩单车，跑吓，撞啱见到呢度。」

Celia K.的麻雀房，亦被囡囡的钢琴所霸占。

Celia K.屋企唔多摆设，最多也是一家人的照片。

由于小朋友爱画墙，所以新屋入伙前Celia K.冇特别装修，预留更多空间给女儿，「只系摆啲生活必需品，其他全部系佢哋啲嘢，每层都有张牀，地下又有啲书，等佢哋唔使行嚟行去，本身预个厅唔摆玩具，佢哋都会攞落嚟，1楼预畀佢哋做玩乐空间，有日老公话不如摆个波波池喺度，再有滑梯等等，愈加愈多佢哋喜欢嘅嘢。」本来老公安排了一间麻雀房及天台按摩池让Celia K.跟朋友聚会，但最后多了个钢琴及沙池，逐渐被囡囡物品侵占，Celia K.笑言都已经习惯，冇乜所谓。