古天后日志｜港股行一步退两步 成交欠奉一潭死水

7月29日，天晴，天气酷热，高温持续，注意补充水份。美国第二季土GDP下降0.9%，已连续两季出现负增长，技术上已步入衰退，美股先跌后回升，淡仓继续被挟爆，道指升332点；标指跟纳指分别升48点及130点，三大指数升逾1%。明明系经济衰退，市场却将之视为好消息，憧憬联储局放慢加息步伐，坏消息当好消息嚟炒，美股明显短期市场气氛炽热，一如上月港股挟至22000水平，同样系唔需要有理由。

美企公布嘅业绩唔少都差过预期，相关股份同样先跌后回升，市场无视利淡因素，主要系之前睇淡美股嘅人太多，以喺基金现金水平偏高下，淡仓一挟就急升，美股熊市真系咁快完？理智少少去谂，喺通胀仍然高居不下，联储局可以停止加息？甚至减返转头？呢啲都只系市场一厢情愿嘅想法，不过市场情绪带动下，美股乐观得过份，若然根据有智慧不如趁势呢个法则去参与炒作，就要小心控制风险，除咗注码上唔可以进取，尽量短线操作，一旦见走势逆转要肯投降打靶，否则又系换嚟资金被套窂嘅下场。

马云先失阿里 再失蚂蚁？

有消息指马云计划放弃阿里旗下金融科技巨头蚂蚁集团嘅控制权，方案之一系将部分投票权转移给手下如井贤栋。无论马云放弃蚂蚁嘅动机如何，一旦呢个计划落实，蚂蚁嘅上市计划，睇怕只有再延期，之前几度误传蚂蚁重启上市计划，唔单止系狼来了，误信消息追货，怕且又成韭菜被割。不过有口痕友话，马云先失阿里，再失蚂蚁，本身就系史上最大嘅一棵韭菜，一般小股民被割韭菜又算得系乜嘢。

至于港股呢边，真系不提也罢，美股升又跟唔上，美股稍有震荡，港股就跌突，目前走势系行前一步退两步。成交萎缩，无新资金入场，睇嚟上月大市挟升至22000水平，唔少追入资金又被套死，市场购买力被消耗。港股一日唔解决缺水问题，就算唔再大幅下跌，维持上落格局，但只会系一潭死水。

古天后

(徐狄怡，证监会持牌人)