独家丨陈滢周嘉洛无惧绯闻望再合作直认对方为最多身体接触拍档

2022-08-31 08:00

陈滢跟周嘉洛这对绯闻情侣，最近「定情作」《痞子殿下》推出，绯闻再被炒热，嘉洛更被拍到单拖到陈滢香闺，虽然事后两人否认恋情，但讲明唔介意继续被绯闻缠身，更认为会有助剧集宣传。两人仲自爆对方为最多身体接触的拍档，仲话好想该剧开续集大家继续合作。采访：杜杜摄影：朱伟彦服装：Harvey Nichols Hong Kong(嘉洛)

陈滢同嘉洛讲到头顶屁股呢场戏，又尴尬又好笑。

陈滢人生第一次畀男人打，就是被嘉洛掌掴，笑言之后有复仇机会。

嘉洛坦承不觉被力捧，只是有更多机会，但都要看本身如何把握。

对于绯闻愈传愈烈，有丰富经验陈滢冇有怕，「由佢啦！做得呢行仲要系单身就容易啲惹嘅。」嘉洛就继续口花花，「单身唔够，仲要靓！」两人都承认有晒心理准备，《痞子》播出会好唔得闲，「我哋又冇为咗呢件事觉得大压力或者唔开心，我哋都系咁出去食饭，照一班人出去，同埋啲人接受我哋就会容易锺意『纪威』同『蛮仪』，我哋都好锺意呢两个角色。」

日前嘉洛被拍到出席商演后，独自坐的士去陈滢香闺。

相比起畀陈滢头顶屁股，嘉洛觉得露股出浴戏完全唔尴尬。

谂好晒续集故事

两人又自爆对方是合作对手当中最多亲密接触，陈滢强调，「得意嘅唔系情欲浪漫嘅。」嘉洛仲话，「我哋嘅亲热，好多时系嚟自暴力嘅出发点，有个情况系我哋爬紧隧道，但系佢嗰时系盲咗，爬得快就不停顶到我屁股。」陈滢点晒头话：「其实咁样系好亲密，我都未试过咁样顶一个男仔。」嘉洛再补充，「我都唔用亲密去形容，亲密系甜得滞，我觉得系有啲核突，我都戥佢惨，我系好尴尬，我收（股肌）又唔系，唔收又唔系。」嘉洛坦承第一个反应是想屁股加垫，但太厚又起角会好怪，最终放弃，但承认这场戏相比起在张頴康面前，露股出浴戏更尴尬，「始终有接触，佢又系女仔，同埋嗰场戏其实我系遮晒，唔会有人睇到小嘉洛。」他又表示露股戏已接近底线，但若有机会拍《色戒》这类题材呢？他笑言：「我去到佢嗰个级数都唔介意，但系暂时未有，要修练吓先。」