古天后日志｜港股如无底深潭资金避入场

10月11日，天晴，天气非常乾燥，早晚天气较凉。美股隔晚高开低走，尾市跌幅收窄。道指跟标指分别跌93点及27点；纳指跌110点，盘中曾跌穿上周低位，主要系晶片股走弱拖低，幸而重磅龙头股靠稳，纳指才不至于低位收市。嚟紧周三及周五美国将公布通胀数据，美股是福是祸，反弹定系继续插水嘅指标。

嚟紧有银行股为第三季业绩期揭开序幕，唔少大行已表示喺库存上升及劳工成本高企下，企业盈利难免被蚕食，一旦收入下跌盈利亦难保。与此同时，标指淡仓正持续增加，当淡仓侧埋一边，唔排除美股反弹挟淡友。过往几季美企公布业绩之际，同时宣布回购公司股份，往往带动股价做好，至今美企回购金额已高达4000亿美元，呢个亦系美股喺上两季当全球股市向下时，仍能企于高位。不过嚟到第三季，回购再唔系美股灵丹妙药，美股三个主要指数，喺企业回购下仍然跌跌不休，当然强美元不利股市，另一个原因系明年1月开始，通货膨胀削减法案将正式落地，届时美股想回购便需缴交1%的消费税。目前现金较为充裕嘅公司就博命回购，否则明年就要交税。既然明知明年企业回购意欲或减低，自然令唔少投资者趁公司回购先沽出股份，呢个亦系美股喺第三季表现开始走弱嘅原因。

港股噚日喺北水回归下回软，上周假期后恒指一度报复式反弹千点，重上18000水平，可惜短短三个交易日又打回原形，噚日北水回归帮手沽埋一份，恒指回落至17200水平嘅同时，成交额增至951亿元，说明北水返嚟系沽货唔系买货，睇嚟港股只有再度向下底。暂时未见有边个板块可以敌得过跌市冲击，连药明生物(02269)子公司被剔除美国黑名单，升势都只系昙花一现后倒跌，反映市场都系趁好消息出货，任何因为好消息而追入股份，最终只有资金被套死嘅下场，咁嘅情况下，试明仲有边个愿意将资金投入港股呢个无底深潭。