古天后日志｜港股结算前淡静无方向

11月25日，大致多云，有一两阵骤雨，跟住嚟紧时间天气会明显转凉，各位女士置咗新冬装，可以准备登场。隔晚美股假期休市，今晚亦只有半日市，市场等待周末出嘅Black Friday销售数据，预期销售数字唔会有太大惊喜。由于零售市道不景气，高盛调查估计超过四成消费者，打算减少Black Friday当日支出。而唔少零售商已提早于10月初已推出捉销活动，据零售协会估计，今年假日购物消费总支出，可能只会有低单位数增长，远低于去年嘅8.6%及2020年嘅32%高增长。由于市场都已预估呢次嘅零售销售数据唔会好强劲，加上美股只有半日市，美股今晚估计偏向淡静。

至于港股仍然系一场闷局，恒指由上月低位14600水平，反弹至18400水平，不足一个月已回弹超过两成或3800点，目前喺10日线(17800)附近上落，下周二期指结算，大户开始积极转仓，估计转仓期间压系喺17500水平附近，只要大市仍守17000点，及50日线(16991)未有失守，而20日线(16920)已接近升穿50日线，出现第二个黄金交叉，后市仍有条件挑战100日线(18500)左右，甚至进一步挑战19000水平。

值得留意系大市已连续两日成交缩减至1000亿以下，反映现水平资金唔多愿入场买货，但由于世界杯正举行，传统呢段时间都系例静，所以成交缩减亦情有可原。下周二期指结算，呢两日大市波幅逐步收窄，睇嚟喺结算前，港股都唔会有乜睇头。不过，留意期指结算日之前，指数压住转仓，反而下月再升机会较大，只要大市守得住50日线，古天后对后市再弹仍有信心。至于个别板块方面，睇好后市当然系吼啲重磅指数股，港交所(00388)、腾讯(00700)及京东(09618)等优先考虑，QQ能否带领大市下月再挑战18000至19000水平，要多加留意美国债息走势，一旦债息回升，对科技股呢类股份至为不利，但目前喺息口跟通胀双双见顶下，呢方面又唔需要太担心