古天后日志｜接近二万水平为港股建仓理想切入点

2月22日，天晴乾燥，早晚较清凉，日夜温差较大。隔晚美股表现疲弱，主要系10年美债息升至3.96%，意味住下月加息幅度或者唔系0.25%而系0.5%，加息忧虑引发市场不安，悲观情绪带动下，三大指数齐齐跌逾2%，标普跌穿4100首个支持后，正迈向下一支持3900。由于CPI及PPI嘅回落速度不似预期，加上美国虽不至陷入衰退，但有机会呈向横向发展，咁喺现水平嘅美股，经过两三个月反弹后，自然值博率大减，入场资金亦减少。另上标指升至4100-4300水平开始见阻力，而之前回补空嘅买盘亦完成，自然美股回吐压力增加，不过美股暂时又唔见得会出现急跌，标指跌至3900水平，应该有一定支持。

自11月美股带领全球股市反弹，市场一直憧憬通胀回落，息率回落，甚至期望今年减息。不过喺中国开关后，资源价格已逐步回升，如此一来，通胀无乜可能大幅回落，美国嘅核心PCE要回落至联储局期望水平2%，机会都好低。所以对于今年下半年减息，古天后一直抱怀疑态度，目前睇嚟今年放缓加息已经要开香槟。

至于港股呢边，噚日大笨象(00005)派成绩表，业绩系好过预期少少，但午后其股价系先升后回，但至ADR时段升破60元水平，其实呢个先应该系反映噚日季绩嘅价格，今日预期大笨象都会上60元水平。不过呢啲水平嘅大笨象，唔单止已反映其优于预期嘅季绩，亦反映埋派息预期，所以呢啲位亦唔建议再追货。

2月份港股一直处于回调浪之中，嚟到现水平，已接近回补1月初20200嘅另一个上升裂口，估计喺回补呢个裂口后，顶多考验埋250日线，即20080左右，而20000呢个心理关口，料有不俗支持。虽然暂未见港股再有新资金流入，难支持港股出现较大升幅，但下月两会举行在即，加上2月调整幅度已足够，喺现水平开始买货，具有一定防守性，若然要建立港股仓位，现水平应该系一个唔错嘅切入点。