古天后日志｜阿爷今次唔打嘴炮 滙金入市意义重大

10月12日，部份时间有阳光，系一个风和日丽嘅日子。联储局官员连番放鸽，美股已连弹四日，道指再升65点，标指跟纳指分别升18点及96点。以前多次提到标指4300点系一个重要支持，果然呢个位都几守得，但估计去到4,400点至4,450点又再度返覆。暂时美股再炒减息概念，呢个概念都炒咗两季，虽然美国经齐未完全回复至疫情前，但标指已从3,500点反弹至4,400点水平，升幅超过两成，而个别股份更升五成甚至一倍，其实美股现价估值一啲都唔平，但憧憬未来两年减息，经济回复活力，企业盈利回升，美股早已偷步炒上，信未来两年美国经济渐入佳境，美股只能贵买贵卖。

美股焦点目前当然仲系讲紧个债息，但企业盈利都相当重要，Q1标指盈利同比下降只有3.1%，远比年初预测降幅达5%甚至更多低，结果带来美股报复式反弹，反映美国经济未如预期咁差，嗰啲美国经济陷入衰退嘅言论，更加系不攻自破。至于去到Q2，企业盈利平均下跌6.5%，亦系合符预期，估计Q3喺营收轻微增长下，盈利有望增长5%，Q4进一步回升至10%以上，其中科技股经过裁员潮后，成本大降盈利复苏应该更为强劲。

呢个星期五银行股将为新一轮美企业绩期揭开序幕，由于经历3月份嘅银行危机，估计坏帐拨备上升下，盈利表现麻麻，但唔少银行股嘅股价已回落至近日低位，若然业绩出嚟唔系太差，唔排除有资金偷步抄底。即管睇睇嚟紧美股业绩期，美股点样发展。

暂未见外资重新入场

至于港股呢边似乎有啲转势，港股连升五个交易日，成功突破10日及20日线后，隔晚于ADR再升近250点。主要系前日收市传出中国准备再出招刺激经济消息后，今次阿爷唔系净打嘴炮，噚日「国家队」汇金公司入市增持四大国有银行A股，虽然只系5亿左右，但系自2015年8月以嚟再次入场，意义重大。虽然暂时未见外资重新入场，但至少淡友会先收敛，港股亦可借势继续挟升。

从技术面分析，恒指由17,094点反覆回升，踏入10月除月头两个交易日下跌，至今已连升五个交易日，今日预期随隔晚做好，若成功挑战50日线，18,249点企稳，有条件进一步向100日线18,702点推进，而呢个位刚好亦系9月5日下跌裂口18,725点至18,789附近。若然未能企稳50日线，即市回调支持位系18,050点至18,150点左右。

相关文章：

港股市况｜国家队入市利好 恒指高开365点 工行升逾4% 舜宇大涨8%

---
星岛X理大携手推动永续发展 「ESG认证计划暨嘉许礼」2023  把握报名机会 https://bit.ly/45kDhn5

《星岛头条》APP经已推出最新版本，请立即更新，浏览更精彩内容：https://bit.ly/3yLrgYZ