童時愛上你丨楊卓娜扭計骰肖像畫製作耗時224小時與吳家樂第三度演夫妻不覺悶

2022-07-08 20:30

TVB劇集《童時愛上你》昨晚（7日）播出第9集，楊卓娜飾演的Elsa與吳家樂飾演的Rock這對夫妻貌合神離，卻在網上以「扭計俠」及「小女鞋」身分相處融洽。Rock一早知道Elsa就是「小女鞋」，仍保守秘密繼續接觸「小女鞋」尋求慰藉。隨着Elsa嗌離婚，Rock終於鼓起勇氣自揭「扭計俠」身分，Elsa對此不但未能接受，更怒摑Rock兼淚崩，斥對方明知自己對「扭計俠」有感情，Rock哭着跪求原諒，Elsa推跌Rock以扭計骰砌成的肖像畫後憤然離去。

對於角色屢獲好評，楊卓娜（Lenna）受訪時歸功於劇本說：「啲爆喊戲都係跟住劇本去做，只要放鬆自己投入個角色就OK，完全冇刻意諗啲傷心嘢，因為劇本好，令到我情緒推動好自然，對演員嚟講係好大幫助。」談到角色情緒起伏大，Lenna透露未有將負面情緒帶回家：「咁多年嚟都冇試過，可能未遇到過真係好精神分裂嘅角色。」

Elsa知道咗Rock就係「扭計俠」之後，嬲到怒摑Rock。

楊卓娜話爆喊戲都係跟住劇本去做。

Rock爆喊加跪埋喺度道歉都冇用……

吳家樂喊到鼻涕都流埋出嚟，入晒戲！

楊卓娜又指與家樂的決裂戲是其中一場最深刻場口，她說：「嗰場戲令到我好崩潰，同埋我要推冧嗰幅肖像畫，幅畫係公司嘅美指同道具部用咗好多時間同埋好多粒扭計骰砌出嚟，推冧佢真係好心痛。我真係好鍾意幅畫，嗰刻我真係有啲崩潰，覺得好對唔住公司道具部嘅同事！」據知這幅楊卓娜扭計骰肖像畫，總共動用了672個扭計骰，而每個扭計骰要扭成所需圖案約耗時20分鐘，即共用了約224小時製作，一點都不簡單。講到第三度與吳家樂演夫妻，Lenna笑言：「嚟緊有套劇又係同佢做一對，但因為每次嘅角色同埋發揮都好唔同，一定唔會令到觀眾有悶嘅感覺，係有新鮮感同埋有趣嘅。」

另外，吳家樂為演好「扭計俠」花了不少功夫，監製廖晉碩透露當家樂知道角色擅長玩扭計骰後便開始在家中苦練，監製說：「其中一場講佢一邊傾偈一邊好快咁玩扭計骰，單單一場咁小嘅場口，家樂都用咗好長時間去練，真係落咗好多心機！」