古天后日誌｜港股一浪低於一浪形態未改

9月11日，大致多雲及有驟雨，局部地區雨勢較為頻密及有雷暴。上周五黑雨來襲，港股休市，美股周四及周五兩晚均出現先低後高走勢，但反彈力度一般，但尚算企得穩，上周五道指升75點，標指升6點，納指升12點。暫時美股未見有大跌跡象，目前美股似係好淡對疊，睇好嘅相信息口快將見頂，有利融資成本回落及投資活動增加，所以會見到逢低有買盤入場。至於睇淡嘅係認為目前美股估值太高，以標普平均市盈率24至25倍計，回報率唔夠4%，當10年債息率達4.28%，股票回報相對唔吸引。

標普盈利第2季錄得倒退4.1%，上半年錄得單位數跌幅，估計第3季度可望平穩沒升跌，第4季度或者可回復至高單位數升幅，全年計僅出現輕微倒退。以目前標指水平4,450點計，26倍以上市盈率又確係偏貴，但考慮到明年盈利恢復增長，一旦開始步入減息，債券息率便會從4.2%降至3%或以下，屆時股市會變得更吸引，所以就算目前美股係偏貴少少，但係減息預期下，回調幅度未必太大，或者只會喺高位整固。

本周三美國將公佈8月份CPI， 7月已回升至3.30%，估計8月會進一步升至3.8%水平，然後趨向平穩。喺過去數月裡購房人數上升，美國租金從7月開始回落，估計呢部份將會由10月開始陸續反映喺CPI身上，並於12月到達峰值。預期CPI喺未來數月會持續反彈，12月前或於3.5%至4%之間徘徊，明年初再度回落，若明年CPI再度跌至3%或以下，美聯儲便開始有條件減息。只要減息，美股嘅投資回報就會變得有返吸引力。

港股仍然係一潭死水

至於港股呢邊，喺上周四晚夜期跟ADR均見下跌，並失守18,000點大關，黑期亦於萬八邊沿，預期今日港股跟隨向下，即市支持位大約係17,800點，若然失守17,800點，預期港股將進一步下試17,500點及17,300點向下尋找支持。講到底，自外資撤出中港股市後，兩地股市嚴重缺水，再加上人民幣走弱，進一步打擊內地企業收入，雖然阿爺一再出招欲救經濟，可惜過往多年過度槓桿，今日自嘗惡果，喺債務問題持續困擾下，中港股市一段時間無運行，古天后一直強調港股只會有波幅，冇升幅，近呢半年嘅走勢一直係一浪低於一浪，之前有人認為阿爺救市，港股有望收復二萬大關，都只係一廂情願嘅想法，每日平均成交額不足千億元，可見港股仍然係一潭死水，早已成為投資者眼中棄嬰。

相關文章：

港股市況｜歷世紀暴雨後 恒指低開260點 失守萬八關 新地績後挫近11%

---

《星島頭條》APP經已推出最新版本，請立即更新，瀏覽更精彩內容：https://bit.ly/3yLrgYZ