鮑爺央行年會講話成一本周焦點｜古天后

上周美股延續強勢反彈，道指升近3%，標指升近4%，納指更升逾5.2%，呢次反彈係美股8月5日大跌市後反彈浪延續。上周公布嘅美國數據反映通脹溫和下跌，消費開支靠穩，就業情況則不過不失，市場預期測聯儲局9月議息時，減息0.25厘機會大增，股市相應作出調整。

本周較具注目嘅數據有周二公佈的費城製造業指數，前值為負19.1%；周三將公布聯儲局7月議息紀錄；周四有上周首次申領失業救濟人數，前值為22.7萬人；同日有7月成屋銷售數據，料為升0.3%；周五為新屋銷售數據，料為升2.6%。雖然數據較上星期略為減少，但本周數據亦將反映9月聯儲局將有何決定。目前利率期貨數據顯示，交易商預計儲局9月減息0.25厘機會率為76%。

美銀經濟師Michael Gapen表示，市場嘅焦點仍為揣測聯儲局9月議息結果，而鮑爺本周五嘅Jackson Hole 央行年會上嘅講話，大有可能為此定調，因此成為市場最關注事項。他指出，如果鮑威爾語調較7月時溫和，即意味9月開始減息嘅可能性相當高，若然會上積極放鴿，減息0.5厘機會率便會更高。至於美國業績期已踏入尾聲，本周公布業績嘅重磅股主要是大型零售商，包括 Lowe's、Target、Macy's、TJX及BJ's等等。季績及對後市睇法被分析員視為零售市道未來表現嘅參考。

港股向上挑戰50日線

港股方面，同樣踏入業績高峰期，港交所（388）、小米集團（1810）、友邦保險（1299）等指數權重股，相繼於本周公布中期業績，料將左右股市走勢；而內地將公布貸款市場報價利率（LPR），亦值得市場關注。

港股上星期連續第二周上升，恒指重上250日線（17295），即俗稱牛熊線，上周五恒指報收17430，上周五晚反映中概股嘅金龍指數升勢有餘未盡，恒指夜期再升151點，報收17575，今早黑期也升越17500關，預期恒指高開向上挑戰50日線（17612）及100日線（17675）阻力；至於250日線，約17300將成為是日重要支持。

港股能否延續反彈之勢，除視乎外圍股市走勢外，成交能否配合亦重要，否則目前嘅升勢只為跌浪中反彈，又或係挾淡倉嘅短暫上升，港股於17600水平阻力唔少，17800水平阻力更大。

古天后