望子成龙激赞囝囝画作　林盛斌浮夸演技获封影帝

一班「星级B仔」真系好可爱！所谓「孻仔孻心肝」，2017年终于追仔成功的林盛斌（Bob），可谓锡到个细仔林道申（Jaye）燶，仲不时于社交网分享囝囝萌照与生活点滴，今日他又于IG上载了一段影片，片中一开头Jaye靦腆地拎住幅画冲向爸爸，然后弹弹吓向爸爸表示：「我自己（画）㗎！」语毕Bob即爆发「神级演技」瞪大对眼，并一边扮惊讶掩嘴一边高呼：「咩话？唔系呀嘛！哗！咁靓嘅？！你画㗎？你讲真定讲笑呀？」

结果赞到Jaye都劲唔好意思趴喺张枱度答：「讲真㗎！（Bob：你有冇讲大话㗎？）唔系啦！」接着Bob再加多两钱肉紧说：「哗！好靓呀大佬！好夸张呀！黐线！哗！你超劲罗！」见爸爸咁欣赏自己的作品，Jaye都情不自禁哄埋Bob度献吻，但当下Bob冇为意拧歪面，继续「鉴赏」囝囝的大作，又「Dum」晒脚一轮嘴赞：「好犀利呀！系黑色嘅彩虹呀！」Jaye就冧爆挨落爸爸身上。

Bob以「亲子育儿速成班」为题留言：「好耐之前，曾经听过一个育儿专家讲，佢话多啲赞美同嘉许你嘅小朋友，佢哋嘅童年过得开心，长大后会更成功。不过，可能我想佢哋好好好好好成功，所以我系用力咗少少，夸张咗少少........」对此，一众网民纷纷笑爆说：「好浮夸呀爸爸」、「影帝」、「最佳男主角」、「演技超晒班」、「笑到抽筋」等。

另边厢，林芊妤（Coffee）亦晒一家三口温馨照，但似乎两父子的甜蜜互动令她好妒忌！事缘他们去酒店Staycation，庆祝一家之主翟志荣生日，未料影合照时，瞓喺老公大髀的Coffee叫父子锡她，结果按下快门一刻，翟志荣与囝囝翟德彦（翟伯伯）竟「自私」咀嘴，激到Coffee追问：「没有我!!!?
Not allowed!!!」伯伯即耍冧笑谓：「其实我眼里只有🎂（蛋糕）」