独家丨RB阿正帮手凑女等老婆专心拣嘢唔怕迫趁假期行商场

2022-06-04 07:00

乐队RubberBand（RB）结他手冯庭正（阿正）留着一把长发，外形不羁，其实佢系爱妻号，同太太尚羚（原名黄淑玲）非常恩爱。日前趁住有几天公众假期，一家三口加埋工人就外出到商场行名店，享受家庭乐，阿正更识做地帮手照顾囡囡，等太太可以慢慢Shopping。

采访：娱乐组

阿正太太睇中戒指，不过试戴后似乎唔啱心水。

阿正抱住囡囡等太太慢慢拣。

RubberBand的阿正六年前娶选美出身的尚羚，二人的囡囡亦已岁半大。日前适逢连续有几天公众假期，可能见疫情缓和，阿正一家去咗行商场。当日下午，阿正一家到中环ifc购物，现场所见众人似各有职责，见其妻抱着BB，而工人就孭着一大袋，另外手上又挽着一袋，跟在阿正夫妇身边。阿正似早有目标，见他主力行优闲服饰店，两公婆走到男装部不时有倾有讲，之后男方兜咗一个圈都冇心水，最后走回太太身边，二人再讲了几句，阿正拧一拧头就一齐离开。

阿正主力睇男装衫。

打扮朴实的阿正未有被途人认出。

睇极都冇心水

阿正一家行去隔邻的酒店取车，可能打扮朴实，未有人认出眼前系阿正。其间众人经过钟表店时，阿正太太好有兴趣即入内拣款式，阿正好识做，为令老婆可以专心睇嘢，不但帮手凑囡囡，更一直陪住老婆在店内行来行去，试戴饰物时又有给予意见。阿正太太睇中一只戒指，见她试戴时，脱下疑似婚戒，再戴戒指上手研究，不过试完后可能与想像有所出入，她再行去另一饰柜拣选，但拣多一阵都系冇心水，最后一行人行去酒店取车离开。