古天后日志｜腾讯大股东减持 一盘冷水照头淋 

6月28日，天晴，但局部地区有骤雨，日间天气酷热。美股上周强劲反弹后，隔晚见回吐，但回吐压力唔大，道指跌62点；标指跟纳指分别跌11点及83点。虽然美国唔少大行都认为美股仍未见今年底部，但喺半年结粉饰橱窗效应下，呢几日美股仲顶得几下，但嚟紧两个月系美企业绩期，一旦业绩公布未如理想，又或者公司调低今年嘅盈利预测，甚至对前景预期由乐观转为审慎，对美股当然会构成压力。而10年美债息亦从3厘边呇回升至3.2%，喺美债息高企下，亦难免防碍美股进一步反弹。

俄罗斯主权债噚日出现技术性违约，地缘政治因素系主要原因，但喺美汇指数强势下，美元万剑归宗回流美国，其他地方难免出现美元荒。早前欧央行已就意大利或再现债务危机而召开紧急回议，如今俄罗斯债务违约，当然勾起市场对新兴市场国家嘅债务问题忧虑。

当然新兴市场债务一旦出现问题，中国亦难以独善其身，事实上内地亦担心美元大量流失，已多月限制美元流走。只系喺抗疫三年拖累经济步伐之馀，内地同时决定大搞基建已稳经济，即系内地地方政府系收入减少之际，支出反而增加，唔少地方政府负债比率闲闲地几百个%，内地地方政府债务问题亦不容忽视。

有心买腾讯都要睇定啲

港股喺短短几个交易日反弹逾千点，恒指重上22000大关，当好友以为可以进一步推高恒指至4月高位，即22500水平之际，腾讯(00700)主要股东之一南非基金Naspers就一盘冷水照头淋。旧年4月Naspers曾配股减持腾讯，并承诺三年之内唔再减持，但噚日就反口，表示会喺市场一步步减持腾讯沽货套现，原因系公司等钱去进行回购其他投资咗嘅公司。呢个消息一出，腾讯股价噚日午后转升为跌。

同时Naspers亦表示已于上周将之前腾讯实物派送嘅京东(09618)全数清货套现286亿元，都算好坦白，皆因其京东持股低于5%，其实系无必要公告天下，佢已沽咗货嘅。但系Naspers持有逾两成腾讯股份，减持不得不公布，家阵先事张扬要走佬，睇嚟系希望先自首，减低其后沽货对市场带嚟嘅震荡。

虽然唔少缸边友憧憬港股连日嘅上升，恒指能重上22000水平，港股料可否极泰来，扭转跌势，但Naspers呢个时候打晒开口牌要减持腾讯，并已尽沽手上京东股份，摆明系走先喇，系咁先喇，话就话Naspers近年投资连番失利，等钱使要卖腾讯，但与此同时套现笔钱系要回购其他公司，呢个动作反映连大户都觉得腾讯跟京东呢啲价已系咁上下，人哋大户沽货，断估阁下唔会笨到去接货畀人割韭菜，就算有心买腾讯或京东作中长线投资，睇嚟都要睇定啲再算。

古天后

(徐狄怡，证监会持牌人)