古天后日志｜港股乏成交配合难破闷局

8月31日，天气炎热，部份时间有阳光，亦有几阵骤雨及雷暴。隔晚美股高开低走，美股连续第三日下跌，早段开以略为弹一弹即散，道指早段升逾百点后，收市跌308点；标指跟纳指分别跌44点及134点，跌幅超过1%。近两个星期美股开始热炒三四线股仔，甚至系缺乏基本因素支持嘅Meme股，重磅股唔行，就算过后拆细必炒嘅灵丹妙药，喺TSLA拆细后亦失效，见项回落，美股都炒到接近尾声，小心音乐椅游戏音乐随时停。话口未完，美股就连跌三个交易日。睇嚟美股开始进入另一个调整浪，加上9月加息0.75厘嘅预期大增，喺议息前美股睇嚟易跌难升。

至于港股呢边，噚日恒指喺期货结算日，又再失守二万大关，虽然比亚迪(01211)交出一份理想业绩，但股价未见有太大反应，只系略为抽高3%就无再follow。而噚日收市后就爆出股神巴菲特早于8月24日已喺市场沽逾百万股，隔晚股价喺ADR插水，股价较噚日H股收市跌逾4%，今日唔使问都会裂口低开，240元有个支持位，睇下守唔守，失守嘅话，下一个支持位要去到220，都咪话唔大镬。

港股整体仍未摆脱上落市格局，上周好友一度借中美就中概股达成审计协议发动攻势，港股由低位19200反弹，至上周五晚夜期更一度挟升至20500水平，不过二万点喺噚日结算日再度失守。淡友更借隔晚美股继续走软，再发力将夜期推低至19400水平，今日港股都系继续向下炒。恒指短线支持大约系19500点，喺大市仍缺乏成交之下，大户要舞高弄低指数更从心所欲。暂时恒指或于19200至20200水平呢一千点上落。

古天后

(徐狄怡，证监会持牌人)