古天后日志｜港股虽强但现货呈超买 现价追入值博率低

12月6日，大致多云，早晚清凉，下午部份时间有阳光，天气乾燥。虽然鲍爷开始转口风放鸽，但多间大行不约而同唱淡美股，令隔晚美股全线向下，道指跌482点；标指跟纳指分别跌72点及221点，标指继续喺3900至4100整固，留意美股近日升市成交减少，跌市成交增加，虽然对后市仍乐观，但都要小心谨慎。

暂时主导美股仍然系息口走势，而息口升跌主要睇通胀，影响美国通胀嘅主要系核心商品价格，包括油价及资源价格，第二项系住屋服务如租金支出等，第三项就系住屋以外嘅支出。目前油价已较高位回落，并已从CPI数据中反映，而住屋支出一向有所滞后，不过美国房价过去5个月已从高位开始回吐，应该好快会喺CPI数据中反映。至于非住屋支出一向较难估计，主要系民众嘅收入决定，不过从强劲嘅就业市场嚟睇，薪金收入未有减少，即系零售消费仍然强劲，不过呢一部份一向影响CPI最少，只要第一同第二项数字下降，CPI回落嘅速度自然会加快。只要CPI持续回落，美息亦无再向上嘅条件，咁暂时对美股后市可以继续乐观嘅，只系留意成交要审慎少少。

至于港股暂时仍然炒紧内地放寛防疫措施，虽然夜期跟ADR隔晚随美股回落，但短线能守住19200点，后市仍有条件再上，只系已经急升咗咁多，再加上现货超买，短期再大力抽升力度有限，目前追货已乏值博率，相反有货喺手可以逐步减货，需记得食鱼嘅时候，鱼头鱼尾通常都食唔晒，食得到个鱼身，即系17000上嚟19000呢一截，已经相当满足。