古天后日志｜港股现水平重现吸引力惟成交未能配合

2月23日，天晴，早晚清凉，天气乾燥。隔晩美股表现反覆，2月份FOMC会议纪录显示，委员支持继续加息，以压抑通胀为主要目标，三大指数纳指喘定，升14点；但道指跌84点；标指更连跌四个交易日，跌6点。虽然美股喺走势上未能突破旗型向上，不过美国经济今年陷入衰退机会有限，美股仍然可以逢低收集，只要企业盈利表现唔系太差，业绩交到功课，美股再大跌机会唔大。

目前市场仍然系由息口走势主导，虽然10年期债息重返3.9%水平，但2年债息未升破去年高位4.81%，市场仍然推算美息可能喺5.25%见顶，但喺通胀回落速度不及预期下，今年下半年减息机会大减，可能要待明年初先有机会减息。而10年债息目前处于3.91%，自然令股票吸引力大减，除非企业盈利出现大幅增长。

百度(09888)噚日喺港股收市后公布业绩，业绩表现优于预期，同时公布50亿美元回购计划，但股价先升后回软，似乎百度要真金白银喺市场回购，股价先有望回升。百度一直被市场认为公司随波逐流，每当市场有边种业务或技术兴起，公司就会表示要发展，反而忽略本业。而最近公司亦表示将参与AI发展，就吸引北水入场。百度嘅AI业务如何，暂时都系未知数。百度只系由资金主导上落，大家跟势炒作，注意严守止蚀，若然真心想投资有关AI前景嘅股份，美股嘅微软跟Google肯定较为坚实。

至于港股喺2月份由高位调整，由22700水平跌至现水平，已下跌超过2000点，2月份嘅波幅，已足以满足单月波幅要求，而港股逼近20000水平，亦重现吸引力，呢啲水平开始再收集重磅指数股，系一个唔错嘅切入点，除非大市跌穿250日线未能于两三日之内收复，否则现水平买货，应该有一定防守力。问题系港股暂时亦欠缺成交支持，噚日成交亦只有1146亿元，暂未见新钱流入，要大幅推升港股似乎无乜可能。若然有心储货，亦要有耐性等待，下月初内地两会举行，或会借消息拉上，但升势能否持续，仍然要靠成交配合，到时就只有见步行步。