阿碌開咪｜失落的舊香港移民

上世紀開始，香港人大量移民美加英澳。一九八四年出現第一高峰，當時無論任何界別，搞移民，是「趕潮」，故此連演藝界巨星也紛紛揚言「退休移民」。結果，九成半回流。因呆在當地，冇天文數字收入，冇粉絲，又悶又冇乜表演機會，但覺廢廢哋。 　

第二大移民潮，為一九八九年至一九九一年，走到嘭嘭聲。之後，相對平靜，直至二○一九年。近月再創高峰，點解？使乜解？

小弟乃上世紀八十年代移民，故有丁點身處異地者的心態與經歷。事實，起碼有八至九成移加港人，根本生活仍非常港式，例如關心的是香港新聞，日常食的是廣東菜，早餐也是茶記或廣東茶，交往的，更幾乎全是同聲同氣香港人。

因生活悠閒，故更多時間「關心香港」，間中對香港的一切消息（尤其八卦的），分分鐘比身處香港者更快收到。

年輕移民心態我不敢講，但年長的香港移民，的確情懷在港。

故此，不少舊移民數十年如一日，朝朝七點揸車到便利店，買兩份出爐香港報章（美加版），然後到茶記/茶樓磨兩小時，猶如置身香港。

我也有經歷過這種日子，實乃枯燥移民生活中的極大享受。　

回流返港後，間中再返加探親，逗留日子，仍每朝過着同一模式生活。

點解唔用手機睇報章？報章，設計有大布局，逐頁揭才可看出編輯心思，兼且有陣陣報章香。更重要，手機Mon太細，長者眼睛不靈，點睇？長睇更會壞眼！

事實，不少年長移民睇香港報章，是逐隻字咀嚼的，因有濃濃的思港情懷，未經歷過呢種生涯及心態，極難理解。

晴天霹靂的事終要發生了，慘情，加拿大家姐來短訊：「唉……加拿大星島實體報章八月停刊（附哭泣Emoji……）！」

姐姐乃中產階級，當然有齊手機、iPad、電腦，但四十年移民生涯，一如萬計舊移民，睇慣香港實體報章，豈能取代？

消息「震動」華人社會，西方媒體也有報道，具象徵意義也！

曾智華

 

阿碌開咪