警司陸振中涉殘廁內逼女下屬口交事主供稱陸曾表白並指：難得走埋一齊係緣分

2024-08-13 17:25

事主供稱陸振中曾向她表白，遭質疑有家室時回應「你都有男友啦！」更稱難得一齊是緣分。鍾健華攝

已停職的前沙頭角分區指揮官陸振中涉前年殘廁3度非禮女警案，今於區域法院開審。女事主供稱，被告曾要求接載她上下班，並曾載她到大埔龍尾沙灘看風景，其間被告突然用手搭她肩膀；被告另曾在接載女事主上班時表白，她回應「你有老婆㗎喎」，被告卻稱「你都有男朋友啦」、「難得大家走埋一齊，係一種緣分」；女事主後來又獲被告贈送「小米」電話，被告表示「你唔用，我揾唔到你做嘢」。下午續審。

X供稱不敢拒絕被告接送要求怕對方濫用職權

女事主X供稱，2022年7月3日，X快測結果呈陰性，她通知被告陸振中（43歲），被告着她翌日復工，並致電表示7月4日會來接載X上班，X不敢拒絕，「佢高級過我，我驚如果拒絕咗，佢會濫用佢嘅職權」，被告又表示自己「對每一個確診咗嘅同事都係特別照顧」。

被告接下來數天都駕車接載X上下班。X供稱，7月5日下班時，被告載了她去大埔龍尾沙灘及稱要下車看風景，「個陣落毛毛雨，佢（被告）擔遮，遮咗我去看台」，兩人看向海和沙灘方向，其間被告突然用手搭她肩膀，「我好驚好驚，我問佢『阿Sir你做乜呀』」，但被告沒有回應。

陸振中被指向事主表白，還稱與事主難得走在一起「係緣分」。

借接電話之機掙脫被告搭肩

後來X接到督察陸俊宏電話，她便藉機掙脫。X稱她當日原本約了陸俊宏吃飯，但因為被告要接載她，X感到害怕，便事前透過手機分享了定位給陸俊宏。X聽完電話後，告訴被告要回家，兩人便離開。

X稱她當晚回家後，曾致電弟弟講述龍尾泳灘的事件，並再次提及聯和墟街市熟食中心殘廁內遭被告非禮一事；X在庭上抽泣，稱「現場其他人應該感覺到，但無人救我……因為我無話要去廁所，佢（被告）又叫醒我去廁所，我覺得唔係一個正常嘅行為……但係好無助」。

被告示愛X遭質疑有家室卻稱「你都有男朋友啦」

7月6日，被告接載X上班，X稱被告在車內說「鍾意我」，「我就同佢講，阿Sir（被告）你有老婆㗎喎」，被告則回應「你都有男朋友啦」及稱「難得大家走埋一齊，係一種緣分」。X稱她當時沒有回應被告，「我唔知、唔識點俾反應佢」、「因為佢個觀念好錯呀」。

X同日下午曾透過WhatsApp向弟弟講述被告示愛一事，她表示自己與弟弟感情很好，「我覺得係相依為命」，她多次向弟弟講述事件，「因為我唔知點算，我又想揾個人傾訴」。

稱欠證據不敢向管理層反映怕工作受影響

X又稱「我唔想阿媽知，我唔想佢擔心，我唔想佢難受，所以我無同佢講過，到呢一刻都無，淨係得細佬知……我都好唔開心」。

X稱她不敢向管理層反映，「我驚因為被告比我高級，驚佢恃住佢係上級，係工作上對我不利」，而且所有事情都是她的單方面指控，她也沒有證據。

X稱曾要求被告保持距離

X續供稱，她在7月8日曾到被告辦公室，要求被告與她保持距離，「因為我已經受夠佢，係咁無理滋擾我」，她亦表示男朋友有她手機的GPS定位，被告反問「點解你男朋友會知你GPS」、「你部電話唔乾淨，可能被人入侵」及問X「知唔知咩係木馬程式」。

被告送手機要X使用

隨後數天，被告都沒有再找X，但X在7月13日上班時，在其座位發現一個公文袋，內有一部全新的「小米」電話。X稱同日下午她致電被告，被告承認手機是他給的，「我話部電話太貴重，我唔可以收」，但被告要求X使用；翌日X上班時，被告發現她沒有使用「小米」電話，便私下問X「你做咩唔用我部小米，你唔用，我揾唔到你做嘢」，所以X不敢不使用。

X又稱，當晚被告透過微訊告知翌日會接載她上班，被告翌日在車上又觸摸她的右手，「忍唔住掘左佢一下，佢就縮手」。X續指，同年7月15日的飯局上「佢（被告）就出左事，我就逃離咗佢魔掌」。