樂●活｜吃喝玩樂有優惠

鍾意網購嘅朋友，相信對於「直播帶貨」一啲都唔陌生，即時會諗到嘅都係以優惠價搶購衣物服飾、美容護膚、家居用品等。Laurie今晚就準備睇一場搶高級美食嘅「直播帶貨」，講嘅唔係一般水果、零食、飲品，而是親身去高格調居酒屋酒吧，享用美酒佳餚。

今次嘅直播係由ViVi創立嘅直播平台 Mixx Collection舉行，向來以售賣時尚服飾、美容健體、美饌佳餚等，今次更首度與居酒屋酒吧「形Katachi Bar & Kushiyaki」聯乘合作， 除咗會即場推介居酒屋必食名物，更加有獨家優惠。直播會於8月18日晚上9時喺Mixx Collection Facebook頻道舉行。

今晚介紹嘅居酒屋酒吧形Katachi Bar & Kushiyaki，除咗有日式居酒屋佐酒小食外，更擅長於四川及重慶串燒，除咗食材優質、烹調手藝一流，仲有自家秘製調味，上碟成品香口惹味之餘，擺盤更非常打卡able！ 居酒屋酒吧又點少得酒，除咗多款清酒Sake、駐場調酒師創作嘅特色Cocktail外，亦有齊紅酒、白酒、香檳、蘇格蘭威士忌、Gin、Rum等，適合唔好喜好嘅品味。店內更設有電子鏢機、桌球枱及Beer Pong，最啱約埋朋友一齊暢談暢飲。

今次直播中推出嘅獨家優惠係可以即時用7折嘅價錢搶購形Katachi Bar & Kushiyakg嘅餐飲禮券，而且使用效期更長達3個月。

鍾意食嘅朋友都知，新鮮製作、焗製嘅食物就最好食。奇華餅家由8月19日至8月21日期間，會喺灣仔皇后大道東、香港仔利港中心、柴灣新翠商場、將軍澳康城、深水埗西九龍中心、長沙灣青山道666號、尖沙咀加拿芬道、旺角MOKO新世紀廣場及青衣城推出「新鮮焗製奶皇月買一送一」中秋限定優惠。大家可以入手4件裝現烤奶皇月，每盒有2蛋黃奶皇月、同埋朱古力奶皇月及伯爵茶奶皇月各1件，每人限購2盒。順帶提提大家，想食到最美味嘅奶皇月餅，可以用氣炸鍋以160°C加熱約3至4分鐘，或放進焗爐以150°C慢烤約10分鐘，然後取出後放涼1至2分鐘，或可放入微波爐加熱20秒，令味道及口感提升。

星巴克最近正舉行Starbucks Co-Brew 飲品創製活動，大家除咗可以喺網上發揮創意設計星巴克飲品，然後參加投票活動外，更有聽日起每逢周五至周日推出Starbucks® Co-Brew飲品研製室，分別會喺尖沙咀海旁海濱花園星光大道地下（8月19-21日）、銅鑼灣新寧道1號利園三期1樓101-110號鋪（8月26-28日）、太古城中心地下005-006號鋪（9月2-4日）、大埔超級城C區2樓598-599號鋪（9月9-11日）畀大家實際體驗飲品創製，只要在分店購買任何含鮮忌廉的凍手調飲品/星冰樂，便可以免費從10多款配料中挑選2款配料，包括蝴蝶酥、爆谷、棉花糖、多款穀物脆片、威化棒、菠蘿乾、紅莓乾等特別配料，令大眾在店內都可以發揮創意，一嘗不同配搭再到Starbucks Co-Brew網站參與創作。

作者：Laurie Wu（愛保健愛旅遊愛購物的熟女）
[email protected]