闲钱唔好郁，等……｜曾智华

今日标题，是否有点悬疑？点解唔好郁，究竟等乜呢？首先讲唔好郁。香港一般打工仔，无论几辛苦搵钱、储钱及蚀几多钱，受尽教训也好，总之就是念念不忘想「投资」。

昨晚又系有老同学「奔七」，在座全部70过外，竟仍然猛问：「碌Sir，近来有乜好买呀？」真系服晒，班大哥全部入人生暮年，还会有几多日子呀，仲想在「鳄鱼潭」执钱？有冇咁天真？

「棺材本」稳阵至上

小弟不停强调，如今拥有的钱，绝对不能再「投资」（即炒乜炒物），因我哋完全唔输得，揸住的乃「棺材本」，必须稳稳阵阵。

香港今天整体系点，唔使经济学教授都知——「大大只镬」。楼市正在溶化中，你睇吓行政会议议员林健锋心急到喊就应领略。另外，负资产数目随着楼市不断下跌而不断上升，银行当然吓窒兼缩放贷，因唔知楼市会跌成点。惟有狠下心，不但拒绝借钱，相反频频call loan（银行要求提早还款），呢招正似蜡烛两头烧，未知何时会喘定。

外围情况也差到痹，大家一定记得N年前董建华日日念住——中国好香港好，香港好中国好。如今香港唔多好，中国更……

总之西方世界以美国带头，瓣瓣都针对住中国而来，经济手段更频频落重药，包括明令外资撤退。冇乜啱唔啱，纯「国家利益」，如果美国决定全方位砌中国，当然狠招全用。

其实以中央领导层的高度智慧，这个情况理应预咗，只能兵来将挡、水来土淹硬食，一方面谷内需，一方面加速发展新科技，开拓西方世界以外的市场。

瞓身认购政府银债

香港人可以做乜？最重要维持一切人与钱自由出入。尤其后者，如今世界兵凶战危，不少资金要搵安全港。新加坡一定食唔晒，香港只要话畀全球富豪知，钱放呢处，安全又自由，咁就有生存空间与角色。至于小市民，咪乱投资嘞，尤其是长者记住将财富锁死在最安全地方，切忌手多多乱买卖。

我的策略是供满自住单位行雷都唔卖，馀钱大部分锁在政府年金自制终身长粮。然后就是今日标题的「等」嘞。等乜？等年年政府发行银债，铺铺瞓身去尽认购！

资深传媒人 曾智华